რიკარდო პეჩინი - ადამიანი, რომელსაც მემკვიდრეობით ერგო თავისი პროფესია. მისი მამა ალდო წარსულში მუშაობდა "ინტერში", "ლაციოსა" და "პარმაში". ჩვენი სტატიის გმირის გზა კი ფლორენციის "ფიორენტინაში" დაიწყო.

მისი უშუალო მონაწილეობის წყალობით, "იებმა" გაკოტრების შემდეგ დაძლიეს კრიზისი და კვლავ მოახერხეს იტალიის ელიტაში დაბრუნება. შეიძლება ითქვას, რომ პეჩინიმ ფლორენციაში ააშენა ახალი გუნდი. რიკარდოს დამსახურებით "ფიორენტინაში" გადმოვიდნენ ნაკატა, მიკოლი და 20 წლის ჯორჯო კიელინი.



"როგორ უნდა გახდე წარმატებული სკაუტი? უყურე ფეხბურთს, შეაგროვე ინფორმაცია, ნაკლები ილაპარაკე და ბევრი ისმინე. ერთი სიტყვით, იყავი როგორც ჟურნალისტი." - ასეთია პეჩინის კრედო.

2005 წელს იტალიელს მოუვიდა შემოთავაზება "ტოტენჰემიდან". ლონდონელებს სურდათ ევროპის სამხრეთ ნაწილის სატრანსფერო ბაზრის ჩაბარება რიკარდოსთვის. აპენინელი სელექციონერი დათანხმდა "დეზების" წინადადებას. მოგვიანებით, სწორედ მანდ განახორციელებს პეჩინი თავისი კარიერის საუკეთესო ტრანსფერს.



რიკარდო იყო პირველი სკაუტი, რომლის შორთ-ლისტში გაჩნდა ლუკა მოდრიჩის სახელი. იტალიელი 2005 წლიდან აკვირდებოდა ოქროს ბურთის მომავალ მფლობელს, თუმცა "ტოტენჰემის" ხელმძღვანელობას სულაც არ ხიბლავდა ხორვატის კანდიდატურა, მიზეზი - ფიზიკური სისუსტე.

პეჩინი მაინც რეგულარულად სტუმრობდა ბალკანეთს, იმის იმედით, რომ ადრე თუ გვიან, ლუკა აუცილებლად გახდებოდა "ჰოტსპურის" ფეხბურთელი. ევრო 2008-ის შემდეგ, რიკარდოს გამოუჩნდნენ კონკურენტები.



მოდრიჩმა გაიბრწყინა კონტინენტის პირველობაზე, მისი სახელი კი დაუკავშირეს "ბარსელონას", "არსენალსა" და "მანჩესტერ სიტის". აღსანიშნავია, რომ ხორვატი სინჯებზეც კი იყო მიწვეული "ბლაუგრანაში", თუმცა კატალონიელებმა არ ისურვეს გამხდარი და დაბალი ფლეიმეიქერის გაფორმება (მესიმ ჩაიცინა).

რიკარდო აანალიზებდა, რომ მთავარი კონკურენტი "ბარსას" სახით მოცილებული იყო, "მეთოფეებისა" და "ქალაქელების" დაჯაბნა კი პრინციპის საქმეს წარმოადგენდა. პეჩინიმ იდეალურად შეასრულა თავისი მისია.



მან ბოლოს მაინც დაიყოლია "ტოტენჰემის" ხელმძღვანელობა. მოდრიჩთან ერთად, იტალიელმა გადმოიბირა კიდევ ორი ხორვატი - კრანჩარი და ჩორლუკა. ადამიანი, რომელიც ამწარებს "არსენალს", ნებისმიერ სფეროში, "ჰოტსპურში" ითვლება მეფედ. ლუკას ტრანსფერის შემდეგ, რიკარდო სწორედ აღნიშნულ კატეგორიაში ჩაჯდა.



2012 წელს ევროპის სატრანსფერო ბაზარზე შემოიჭრა ახალი პროექტი სახელად "მონაკო", რომელმაც მოგვიანებით გაიფორმა ფალკაო და ხამესი. "თავადებს" სჭირდებოდათ კომპეტენტური პიროვნება ახალგაზრდული სექტორისთვის.

"მონეგასკებმა" მოიწვიეს სწორედ პეჩინი, რიკარდო თავის მხრივ სიამოვნებით დათანხმდა მორიგ გამოწვევას. იტალიელმა მოკლე დროში აღმოაჩინა ისეთი ტალანტები, როგორც ლემარი, მარსიალი და კონდოგბია. აპენინელის მთავარი საჩუქარი "მონაკოსთვის" კი უდავოდ კილიან მბაპეა.



ევროპის ნომერ პირველი იუნიორი 14 წლის იყო, როდესაც ის პეჩინიმ შენიშნა. იტალიელმა მოიძია ინფორმაცია ფრანგის შესახებ და აღმოაჩინა, რომ პატარა კილიანი გიჟდებოდა კრიშტიანუ რონალდუზე. შეხვედრის დროს რიკარდო პირდაპირ გადავიდა საქმეზე:

"ვიცი, რომ რონალდუს ფანი ხარ და ცდილობ მას დაემსგავსო. "მანჩესტერსა" და "რეალამდე", კრიშტიანუ თამაშობდა "სპორტინგში", სადაც ის ეჩვეოდა დიდ ფეხბურთს და ემზადებოდა ტოპ-კლუბისთვის."

"ჩვენ იგივე შესაძლებლობის მოცემა შეგვიძლია. "მონაკოში" შენ მოემზადები ევროპული გამოწვევებისთვის და მომავალში თავად გადაწყვიტავ კარიერის მიმდინარეობას. დამიჯერე, ეს გუნდი - იდეალური ვარიანტია ახალგაზრდა ფეხბურთელისთვის."



პეჩინიმ დაიყოლია მბაპე, თუმცა მას არაფერი გაუზვიადებია. "მონაკომ" მართლაც ყველაფერი გააკეთა კილიანის განვითარებისთვის. 2016-2017 წლის სეზონში "მონეგასკებმა" დროებით შეწყვიტეს "პარი სენ-ჟერმენის" ჰეგემონია და ლიგა 1-ის ჩემპიონის ტიტული მიისაკუთრეს.

ამასთან ერთად, "თავადებმა" სენსაციურად გააღწიეს ჩემპიონთა ლიგის 1/2 ფინალში. მბაპეს ფასი მატჩიდან მატჩამდე იწევდა, ბოლოს ყველაფერი დასრულდა 180 მილიონიანი ტრანსფერით "პსჟ"-ში, მსოფლიო ჩემპიონობითა და წლის საუკეთესო ახალგაზრდა ფეხბურთელის ჯილდოთი.



2014 წლიდან რიკარდო მოღვაწეობდა გენუის "სამპდორიაში". დიახ, "ლურჯების" მასშტაბები განსხვავდება იგივე "ტოტენჰემის" ორიენტირებისგან, თუმცა პეჩინი "ბლუჩერკიატიში" 100%-ით თავის გემოზე იყო. ის აღარ არის უბრალოდ სკაუტი, რიკარდო სპორტული დირექტორია.

როგორ დაიწყო პეჩინისა და "სამპას" თანამშრომლობა? "ჰოტსპურსა" და "მონაკოში" მუშაობამდე, არსებობდა დროის პატარა შუალედი, რომელიც რიკარდომ გაატარა სწორედ გენუაში. 2012 წელს კი იტალიელმა "ლურჯებს" ურჩია მაურო იკარდის გაფორმება.



არგენტინელი გოლეადორი ტოვებდა "ბარსელონას", თავის გადაწყვეტილებას "ინტერის" ამჟამინდელი ლიდერი შემდეგნაირად ხსნიდა: "ისედაც ვიცოდი, რომ "ბლაუგრანაში" მომავალი არ მქონდა. მე არ ვერგებოდი კატალონიელთა სათამაშო სტილს. ჩემს თავს სერია ა-ში ვხედავდი."

პეჩინი აღმოჩნდა სწორედ ის პიროვნება, რომელმაც გაიგო იკარდის სიგნალი. მან მომენტალურად დაუკავშირა ნიჭიერი ფორვარდი ყოფილ კლუბს. რა მოხდა შემდეგ? კარგად ვიცით. მაუროს გარდა, რიკარდო დგას შკრინიარის, ტორეირასა და შიკის ტრანსფერების უკან.



2018 წლის ზაფხულში იტალიელმა აღარ გაახანგრძლივა კონტრაქტი "სამპასთან". მას ეპატიჟებოდა "არსენალი", "ინტერი" და ისევ "ტოტენჰემი", თუმცა პეჩინი ყველასთვის მოულოდნელად წავიდა "ემპოლიში", გუნდში, რომელშიც თამაშობს ლევან მჭედლიძე.

"ჩემი სამსახური ეხება კლუბების განვითარებასა და პერსპექტივას. "სამპდორიაში" უკვე ამოვწურე თავი, რატომ მაინცდამაინც "ემპოლი"? ტოსკანელებს აქვთ ერთ-ერთი საუკეთესო აკადემია, არამხოლოდ იტალიაში, არამედ მთელ ევროპაში. ჩვენ ავაშენებთ ახალ გუნდს."