დღეს ჩემპიონთა ლიგის მეორე, უფრო სახელოვანი და ვარსკვლავური, ნახევარფინალური წყვილი ჩაერთვება საქმეში - კატალონიის "ბარსელონა" შინ "ლივერპულს" უმასპინძლებს.

ბარსელონა - ლივერპული

დასაწყისი: 23:00 საათი
სტადიონი: "კამპ ნოუ", ბარსელონა
მთავარი მსაჯი: ბიორნ კუიპერსი (ჰოლანდია)

ბარსელონა

კატალონიურმა გრანდმა სამწლიანი წარუმატებელი სერია შეწყვიტა და ჩემპიონთა ლიგაზე 1/4 ფინალური ეტაპის ბარიერი დაძლია. ერნესტო ვალვერდეს გუნდმა "მანჩესტერ იუნაიტედი" ძალიან დამაჯერებლად და მარტივად გამოაგდო. "ოლდ ტრაფორდზე" 1:0 გამარჯვების შემდეგ კატალონიაში ლეო მესიმ დუბლი გაიფორმა და "ბლაუგრანამ" მეტოქე 3:0 გაანადგურა. ახლა "ბარსას" მორიგი ინგლისური მეტოქე ჰყავს, მაგრამ გაცილებით ძლიერი და ჩემპიონთა ლიგაზე შემართული.



გასულ უქმეებზე "ბარსელონამ" შინ "ლევანტე" ლეო მესის ერთადერთი გოლით დაამარცხა, ჩემპიონობა გაიფორმა და თამაშის შემდეგ კუთვნილი თასიც ჩაიბარა. ასე, რომ გასული კვირის ბოლოს კატალონიელებს ზეიმი ჰქონდათ, ამიტომ "ლივერპულთან" პირველ შეხვედრას კარგ განწყობაზე ხვდებიან. "ბარსამ" ლა ლიგა უკვე მოითავა და ახლა სრულიად ჩემპიონთა ლიგაზეა კონცენტრირებული.

ლივერპული

"ლივერპული" ერთადერთი ნახევარფინალისტია, რომელიც გასულ სეზონშიც ასპარეზობდა ჩემპიონთა ლიგის "ოთხთა სტადიაზე". მერსესაიდულმა გრანდმა მერვედფინალში მიუნხენის "ბაიერნის" გამოგდების შემდეგ 1/4 ფინალში უფრო იოლად გაიკვლია გზა - შინ "პორტუ" 2:0 დაამარცხა, ხოლო პორტუგალიაში გახსნილი მეტოქე 4:1 გაანადგურა. ჩინებულ ფორმაში არიან რობერტო ფირმინო და სადიო მანე, მოჰამედ სალაჰმა კი სწორედ მაშინ აკრიფა ოპტიმალური ფორმა, როდესაც ყველაზე მეტად იყო საჭირო.



"ბარსელონასგან" განსხვავებით "ლივერპულისთვის" ეროვნული ჩემპიონატი უკვე წლებია ოცნებაა და იურგენ კლოპის გუნდი ამ ოცნებისთვის იბრძვის. გასულ უქმეებზე "წითლებმა" შინ უკვე გავარდნილ "ჰადერსფილდს" 5:0 მარტივად გადაურბინეს და ორი ტურით ადრე "მანჩესტერ სიტის" ერთი ქულით ჩამორჩებიან. მერსესაიდელებისთვის ჩემპიონთა ლიგაც პრიორიტეტია, ვინაიდან მათ გასულ სეზონში ფინალი დათმეს.

სრული ძალებით ფინალისთვის!

ეს ის იშვიათი გამონაკლისია, როდესაც ჩემპიონთა ლიგის დიდი 1/2 ფინალური დაპირისპირების წინ ორივე გუნდის საკადრო მდგომარეობა იდეალურია. "ბარსას" მხოლოდ რაფინია აკლია, ხოლო "ლივერპულს" - ადამ ლალანა.



რობერტო ფირმინომ საკუთარი გუნდის ბოლო თამაში გამოტოვა და ბრაზილიელის "კამპ ნოუზე" გასვლა საეჭვოა, მაგრამ დიდი ალბათობით, ბობი ძირითადში იქნება.

სავარაუდო შემადგენლობები

ბარსელონა: ტერ შტეგენი; რობერტო, პიკე, ლენგლე, ალბა; რაკიტიჩი, ბუსკეტსი, არტური; მესი, სუარესი, კოუტინიო.

ლივერპული: ალისონი; არნოლდი, ვან დეიკი, მატიპი, რობერტსონი; ფაბინიო, ჰენდერსონი, ვიინალდუმი; სალაჰი, ფირმინო, მანე.

ბრძოლა მე-6 ტიტულისთვის



"ბარსელონა" და "ლივერპული" ევროპული ფეხბურთის ორი გიგანტია, რომელთაც ჩემპიონთა თასის/ლიგის ტიტული ხუთ-ხუთ-ჯერ აქვთ მოგებული, რაც ამ დაპირისპირებით დამატებით, ძალიან საინტერესო, ინტრიგას მატებს.

ევროპის ყველაზე პრესტიჟული საკლუბო ტურნირი ყველაზე მეტჯერ მადრიდის "რეალს" აქვს მოგებული - 13. შემდეგ მოდის "მილანი" 7 თასით, ხოლო იტალიურ კლუბს ერთბაშად სამი ევროპული გრანდი მოჰყვება - "ბაიერნი", "ბარსელონა" და "ლივერპული". ასე, რომ დღევანდელი წყვილიდან ორივე გუნდის დიდი მოტივაციაა, რომ მე-6 ევროპული თასი მოიპოვოს, წინ გავიდეს და ელიტაში თავისი ადგილი დაიმკვიდროს.

"ბარსამ" ჩემპიონთა ლიგის ტიტული ბოლოს 4 წლის წინ, 2015 წელს, მოიგო. "ლივერპული" კი შარშან ფინალში 13 წლიანი პაუზის შემდეგ გავიდა და ბოლო წარმატება სწორედ 2005 წლის დრამატულ სტამბოლის ფინალში იზეიმა.

მესი Vs ვან დეიკი



ამ დაპირისპირების მთავარი ინტრიგა კი ინდივიდუალური პერსონების უკან იმალება - მიმდინარე სეზონში მსოფლიოს საუკეთესო ფეხბურთელი მსოფლიოს საუკეთესო მცველის წინააღმდეგ. ლეო მესი ფენომენალურ ფორმაშია, ჩემპიონთა ლიგაზე 8 თამაშში 10 გოლის გატანა მოახერხა, მაგრამ მის შეჩერებას დღეს სრულყოფილი და საოცრად დამაჯერებელი, სტაბილური ჰოლანდიელი გიგანტი, ვირჯილ ვან დეიკი, ეცდება.

შესაძლოა ჰოლანდიელი მცველი ამაზე არ ფიქრობს, მაგრამ არ არის გამორიცხული, რომ ოქროს ბურთის ბედიც სწორედ ამ დაპირისპირებაში გადაწყდეს. თუ ამ წყვილში გამარჯვებული საბოლოოდ ჩემპიონთა ლიგის თასსაც დაეუფლება, დიდია ალბათობა, რომ ოქროს ბურთი სწორედ მათ საუკეთესო მოთამაშეს შეხვდეს. "ბარსაში" ასეთი უდავოდ მესია, ხოლო "ლივერპულში" - ვან დეიკი.

ფაქტები და სტატისტიკა:

"ბარსელონა" ჩემპიონთა ლიგის 1/2 ფინალში სამწლიანი პაუზის შემდეგ დაბრუნდა. საერთო ჯამში, ეს კატალონიელებისთვის მე-16 სარეკორდო ნახევარფინალია. წინა 15 პაექრობიდან "ბლაუგრანამ" 7-ჯერ გააღწია ფინალში, 8-ჯერ კი დამარცხდა.

"ლივერპულისთვის" ეს ჩემპიონთა თასის/ლიგის მე-11 ნახევარფინალია. წინა 10 1/2 ფინალური დაპირისპირებიდან მერსესაიდელებმა 8 მოიგეს და მხოლოდ ორჯერ ვერ გავიდნენ ფინალში.

ეს "ბარსელონასა" და "ლივერპულის" მე-9 ევროპული დაპირისპირებაა. წინა 8 შეხვედრიდან 6 2001-07 წლების პერიოდში გაიმართა და მერსესაიდელებმა სამი გამარჯვება მოიპოვეს, ხოლო ესპანელებმა - 2. ორივე გუნდმა 6-6 ბურთი გაიტანა.

ფლეი-ოფის სტადიაზე მერსესაიდულმა გრანდმა "ბარსელონას" სამიდან სამივე შეხვედრა მოუგო.

პირველი ასეთი დაპირისპირება 1975/76 წლების უეფას თასის 1/2 ფინალში გაიმართა და მაშინ "ლივერპულმა" ორი მატჩის ჯამში 2:1 იმარჯვა.

მომდევნო შეხვედრა ისევ უეფას თასის ნახევარფინალში შედგა 2000/01 წლების სეზონში. კატალონიაში უგოლო ფრის შემდეგ "ლივერპულმა" სახლში გარი მაკალისტერის ერთადერთი გოლით იმარჯვა (1:0) და ფინალში მეორე კატალონიური კლუბი, "დეპორტივო ალავესი", დაამარცხა.

ამ გუნდების ბოლო დაპირისპირება კი 12 წლის წინ, 2006/07 წლების ჩემპიონთა ლიგის მერვედფინალში შედგა. მოქმედი ჩემპიონი "ბარსა" ნაადრევ სტადიაზე რაფა ბენიტესის "ლივერპულმა" გამოთიშა ასპარეზობას. "კამპ ნოუზე" ინგლისელებმა 2:1 მოიგეს, სახლში 0:1 დამარცხდნენ და მომდევნო ეტაპზე სტუმრად მეტი ბურთის წყალობით გავიდნენ.



1/2 ფინალურ ეტაპზე განცდილი 8 მარცხიდან ფლეი-ოფში "ბარსამ" სამი სწორედ ინგლისური კლუბებისგან იწვნია, თავად კი პრემიერ ლიგის გუნდი ამ სტადიაზე მხოლოდ ერთხელ გამოაგდო.

ჩემპიონთა ლიგის ეპოქაში ეს "ბარსელონასთვის" მე-12 ნახევარფინალური ეტაპია, რაც მადრიდის "რეალის" (13) შემდეგ საუკეთესო შედეგია.

"ბარსელონამ" ინგლისურ კლუბებთან 25 ორმატჩიანი დუელიდან 15 მოიგო, მათ შორის ბოლო 5.

კატალონიური გრანდისთვის ჩემპიონთა ლიგის მიმდინარე სეზონში "ლივერპული" მე-3 ინგლისური მეტოქეა. ჯგუფურ ეტაპზე "ბარსა" "ტოტენჰემს" შეხვდა (4:2 გასვლა, 1:1 სახლი), ხოლო 1/4 ფინალში "მანჩესტერ იუნაიტედი" გაანადგურა (1:0 გასვლა, 3:0 სახლი).



კატალონიელებმა ინგლისური გუნდების წინააღმდეგ შინ ჩატარებული ბოლო 15 თამაშიდან მხოლოდ ერთი წააგეს - 11 მოგება, 3 ფრე.

საერთო ჯამში, "ბარსას" პრემიერ ლიგის კლუბებთან სახლში დიდებული ბალანსი აქვს: 21 მოგება, 11 ფრე და 2 მარცხი. ორივე შემთხვევაში "კამპ ნოუზე" გამარჯვება "ლივერპულმა" იზეიმა.

"ბარსელონას" ჩემპიონთა ლიგის ფლეი-ოფის სტადიაზე 13 მატჩიანი დაუმარცხებელი საშინაო სერია (11 მოგება, 2 ფრე) აქვს. "ბარსა" ფლეი-ოფში შინ ბოლოს 6 წლის წინ დამარცხდა - 2013 წელს მიუნხენის "ბაიერნთან" 1/2 ფინალში 0:3.

"ბაიერნთან" მარცხის შემდეგ კატალონიურ გრანდს ჩემპიონთა ლიგაზე "კამპ ნოუზე" აღარ წაუგია - 28 მოგება, 3 ფრე.

"ლივერპულს" ესპანური კლუბების წინააღმდეგ ფლეი-ოფში კარგი მაჩვენებელი აქვს: 8 მოგება და მხოლოდ ორი მარცხი. ჩემპიონთა თასზე/ლიგაზე კი მერსესაიდელებმა ლა ლიგის გუნდები სამიდან სამივე შემთხვევაში გამოაგდეს.

მერსესაიდულ გრანდს სტუმრად ესპანურ კლუბებთან ასევე დადებითი ბალანსი აქვს: 7 მოგება, 5 ფრე და 5 წაგება.

ლუის სუარესი და ფილიპე კოუტინიო ყოფილ კლუბს უპირისპირდებიან. ურუგვაელი "ლივერპულის" ღირსებას 2011-14 წლებში იცავდა, ხოლო ბრაზილიელი - 2013-18.