კარიმ ბენზემას ეროვნულ ნაკრებში ხილვა, ბოლო პერიოდის ერთ-ერთი მთავარი აქტუალური თემაა.

შეგახსენებთ, საფრანგეთის ფეხბურთს ფედერაციის პრეზიდენტმა, ნოელ ლე გრემ განაცხადა, რომ მადრიდის "რეალის" ფორვარდის ისტორია "მამლებში" დასრულებულია.

"სამეფო კლუბის" ცხრიანის პასუხმა არ დააყოვნა - "ნოელ, ვფიქრობდი, რომ მწვრთნელის გადაწყვეტილებაში თქვენ არ ერევით!

იცოდეთ, რომ მხოლოდ მე შემიძლია ჩემი სანაკრებო კარიერის დასრულება. თუ ფიქრობთ, რომ ნაკრებში კარიერა დავასრულე, მაშინ ერთ-ერთ იმ ქვეყანაში ასპარეზობის უფლება მომეცით, სადაც თამაშის უფლება მაქვს, შემდეგ კი ვნახოთ".

რთული მისახვედრი არ არის, რომ ბენზემა გულისხმობს თავის ისტორიულ სამშობლოს - ალჟირს.

ფიფას წესების თანახმად, იმ შემთხვევაში, თუ ფეხბურთელმა ერთი ნაკრების მაისურით ოფიციალური მატჩი ჩაატარა, სხვა ეროვნულ გუნდში ასპარეზობა მას აკრძალული აქვს.

არსებობს გამონაკლისი - საფრანგეთის მოქალაქეობაზე უარის თქმა და ალჟირის მოქალაქეობის მიღება.

გავრცელებული ინფორმაციით, კარიმი სწორედ აღნიშნულ ვარიანტს განიხილავს.