15 ყველაზე ძვირადღირებული ტრანსფერი, რომელმაც ვერ გაამართლა

ცოტა ხნის წინ, მადრიდის ატლეტიკომ თავისი სარეკორდო შენაძენი, ჟოაუ ფელიქსი ჩელსის მიჰყიდა.

საფეხბურთო კლუბები წარმატებების მისაღწევად დიდ თანხებს ხარჯავენ, თუმცა, ზოგჯერ, ეს ტრანსფერები არ ამართლებს. ეს, შესაძლოა, რამდენიმე მიზეზმა განაპირობოს - მაგალითად, ფეხბურთელი გუნდს ან მწვრთნელს ვერ შეეწყოს.

Goal.com გვთავაზობს 15 ყველაზე ძვირადღირებულ ტრანსფერს, რომელმაც არ გაამართლა:

რეალის პრეზიდენტი, ფლორენტინო პერესი კოლუმბიელი ფეხბურთელის შეძენით ძალიან ბედნიერი იყო. ხამესმა 2014 წლის მსოფლიო ჩემპიონატზე გაიბრწყინა, რის შემდეგაც მადრიდულ კლუბში გადავიდა და პირველ სეზონში 17 გოლი გაიტანა. თუმცა, 2016 წელს, როცა გუნდი ზინედინ ზიდანმა ჩაიბარა, ყველაფერი შეიცვალა - ფრანგი ლეგენდა როდრიგესს დიდ სათამაშო დროს არ აძლევდა, რის გამოც ის ბაიერნში გაანათხოვრეს. საბოლოოდ, €80-მილიონიანმა შენაძენმა "ლოს ბლანკოსი" უფასოდ დატოვა.

ზლატანი თავისი კარიერით ამაყობს, მაგრამ მისი ბარსელონური პერიოდი ცუდი გამოდგა. ბარსამ შვედის სანაცვლოდ ინტერს სამუელ ეტო'ო და €69.5 მილიონი დაუთმო. იბრაჰიმოვიჩს პეპ გვარდიოლასთან კონფლიქტი ჰქონდა. ზლატანმა ბარსელონაში 21 გოლი გაიტანა. ის ჯერ მილანში იჯარით გაუშვეს და საბოლოოდ, ამავე გუნდში €24 მილიონად გაყიდეს - განათხოვრებითა და ტრანსფერით, ჯამში, "ბლაუგრანამ" €30 მილიონი მიიღო. 

ნეიმარს პარი სენ-ჟერმენში კარგი პერიოდები ჰქონდა, მაგრამ, საბოლოო ჯამში, მისი ტრანსფერი წარუმატებელი გამოდგა. ბრაზილიელი პარიზულ კლუბს პირველი ჩემპიონთა ლიგის მოგებაში უნდა დახმარებოდა და გაებრწყინა, თუმცა მალევე კილიან მბაპეს ჩრდილქვეშ მოექცა. 2022 წელს პსჟ-მა ჟუნიორის გაყიდვა ცადა, საბოლოოდ კი 2023 წელს, ბარსელონადან €222 მილიონად ნაყიდი ფეხბურთელი ალ ჰილალს €90 მილიონად მიჰყიდა. ნეიმარის ტრავმიანობის გათვალისწინებით, პარიზელებმა ნორმალური თანხა აიღეს.

კეპა ყველაზე ძვირადღირებული მეკარეა - 2018 წელს ჩელსიმ არისაბალაგას სანაცვლოდ £72 მილიონი გადაიხადა და მის გაყიდვას ჯერ კიდევ ცდილობს. ესპანელი პირველ ორ სეზონში რეგულარულად თამაშობდა და გუნდიდან ედუარ მენდის წასვლის შემდეგ ძირითადი მეკარის სტატუსი კვლავ დაიბრუნა, მაგრამ, საბოლოო ჯამში, მისი ლონდონური კარიერა არ შედგა. არისაბალაგას ყველაზე "გამორჩეული" მომენტი 2019 წელს, კარაბაო თასის ფინალში, ლივერპულთან შედგა - მან მოედნიდან გავსლაზე უარი თქვა, პენალტების სერიაში ვერცერთი დარტყმა ვერ მოიგერია და თავად გადამწყვეტი თერთმეტმეტრიანი გააფუჭა. ამჟამად, ჩელსის სასტარტო მეკარე რობერტ სანჩესია, კეპა კი, თუ გუნდიდან არ წავა, ისევ სათადარიგოთა სკამზე იქნება.

ბელგიელს "წითელი ეშმაკების" რიგებში რთული პერიოდი ჰქონდა. თავიდან ლუკაკუ ცუდი არ იყო და პირველ 9 მატჩში 10 გოლი გაიტანა, რითაც ბობი ჩარლტონის რეკორდი მოხსნა. მაგრამ მეორე სეზონში რომელუს გაუჭირდა, დიდიხანს არ გაუტანია და ახალი მწვრთნელის, ოლე გუნარ სულშერის ხელში სათამაშო დროც შეუმცირდა. საბოლოო ჯამში, მასში გადახდილი €84.70 მილიონი ცუდი ინვესტიცია გამოდგა. საბოლოოდ, იუნაიტედმა ლუკაკუ €74 მილიონად გაყიდა.

ბევრი ფიქრობს, რომ ალვარო მორატას ძალიან კარგი აგენტი ჰყავს, რადგან ის ტოპ კლუბებში თამაშს განაგრძობს, მაგრამ ხშირად გოლების გატანა უჭირს. ესპანელმა 2016/17 წლების სეზონში 15 გოლი გაიტანა, რის შემდეგაც რეალიდან ჩელსიში €66 მილიონად გადავიდა. მან ლონდონურ კლუბში 18 თვის განმავლობაში მხოლოდ 16 გოლი შეაგდო. ჩელსიმ 2019 წლის იანვარში მორატა ატლეტიკოში გაანათხოვრა და საბოლოოდ, €35 მილიონად გაყიდა.

ფრანგმა 2018 წელს ბარსელონას უარი უთხრა, რამაც ფანები ძალიან გააბრაზა. მიუხედავად ამისა, 1 წლის შემდეგ, კლუბის მაშინდელმა პრეზიდენტმა, ჟოზეპ მარია ბართომეუმ გრიზმანი მაინც იყიდა და მის სანაცვლოდ €120 მილიონი გადაიხადა. ანტუანს კარგი პერიოდები ჰქონდა, მაგრამ ბარსაში თავისი პოტენციალი ვერ გამოავლინა. 2021 წელს ის ატლეტიკოში იჯარით დაბრუნდა, საბოლოოდ კი €22 მილიონად გაიყიდა.

მაგუაიერი ლესტერში შესანიშნავი იყო და 2019 წელს მისი შეძენა პეპ გვარდიოლასაც სურდა. ჰარი ამბობს, რომ მან მანჩესტერ იუნაიტედი აირჩია, მაგრამ სიმართლე ისაა, რომ მანჩესტერ სიტის ამხელა თანხის გადახდა არ სურდა. "წითელმა ეშაკებმა" ინგლისელი მცველის სანაცვლოდ £80 მილიონი გადაიხადეს და, სავარაუდოდ, ამ ფულს უკან ვერასდროს დაიბრუნებენ. მაგუაიერი 2023 წელს ვესტ ჰემში გადასვლასთან ახლოს იყო, მაგრამ ტრანსფერი ჩაიშალა და ის დღემდე მანჩესტერშია. ჰარი იუნაიტედის კაპიტანიც კი იყო, მაგრამ, კაპიტნობაზე მეტად, ფანებს მისგან კომიკური შეცდომები ახსოვთ.

სენეგალელი შემტევი ლიგა 1-ში შესანიშნავი იყო, რის გამოც "მეთოფეებმა" 2019 წელს მის სანაცვლოდ €80 მილიონი გადაიხადეს. პეპემ სასტარტო შემადგენლობაში ადგილი მოიპოვა, მაგრამ მისი ლონდონური კარიერა ვერ შედგა. ნიცაში წარუმატებელი იჯარის შემდეგ, არსენალმა 2023 წელს ის ტრაბზონსპორში უფასოდ გაუშვა, მიუხედავად იმისა, რომ კლუბთან კონტრაქტი კიდევ 1 წლით აკავშირებდა.

"როხიბლანკომ" პორტუგალიელი ამომავალი ვარსკვლავის სანაცვლოდ €126 მილიონი გადაიხადა. ფელიქსი დიეგო სიმეონეს სათამაშო სტილს ვერ მოერგო და მალევე მათ შორის კონფლიქტი წარმოიშვა. 96 მატჩისა და 25 გოლის შემდეგ, 2022/23 წლების სეზონში ის ჩელსიში გაანათხოვრეს. ატლეტიკომ ფელიქსთან კონტრაქტიც გაახანგრძლივა, რათა მასში გადახდილი თანხის ნაწილი მაინც დაებრუნებინა. მომდევნო სეზონში ის ბარსელონაში იჯარით გაუშეს, საბოლოოდ კი მიმდინარე სატრასნფერო ფანჯარაზე ჩელსის €52 მილიონად მიჰყიდეს.

ლუკაკუ ამ სიაში მეორედაცაა. ბელგიელი "ლურჯებში" დიდი ამბიციებით დაბრუნდა. მიუხედავად იმისა, რომ 2021/22 წლების სეზონში რომელუ გუნდის ბომბარდირი იყო, კლუბში მისი მეორე მისვლა იმაზე უარესი იყო, ვიდრე პირველი. მან 44 მატჩში მხოლოდ 15 გოლი გაიტანა და £97.5-მილიონიანი ტრანსფერი ვერ გამართლდა. ჩელსიმ ის - ჯერ ინტერში, შემდეგ კი რომაში გაანათხოვრა და მის გაყიდვას ახლაც ცდილობს.

მანჩესტერმა 2012 წელს პოგბა უფასოდ გაუშვა და საინტერესოა, რომ 10 წლის შემდეგ ისტორია გამეორდა - მან გუნდი კვლავ თავისუფალი აგენტის სტატსუით დატოვა. 2016 წელს ინგლისურმა კლუბმა ფრანგი ნახევარმცველი £89.5 მილიონად დაიბრუნა, 6 წლის შემდეგ კი, იმედგამაცრუებელი პერფორმანსების შემდეგ, ის ისევ იუვეში წავიდა.

ბრაზილიელი ლივერპულის ისტორიაში ერთ-ერთი ყველაზე მნიშნელოვანი ტრანსფერია, ბარსელონასთვის კი - პირიქით. ბარსამ მის სანაცვლოდ €120 მილიონი გადაიხადა, მაგრამ კოუტინიომ გაცემული ავანსები ვერ გაამართლა. 2020 წელს ფილიპე ბაიერნში გაანათხოვრეს, იმავე სეზონში კი ბარსელონას 2 გოლი გაუტანა. საბოლოოდ, ბრაზილიელი ასტონ ვილაში €20 მილიონად გაყიდეს.

ბელგიელი შემტევი მადრიდულ კლუბში €100 მილიონად გადავიდა. პრესეზონზე ედენი ზედმეტი წონით გამოცხადდა, შემდეგ კი ტრავმებმაც დატანჯა. აზარმა გუნდთან ერთად ჩემპიონთა ლიგა მოიგო, მაგრამ მისი წვლილი მინიმალური იყო. საბოლოოდ, გასულ წელს მან საფეხბურთო კარიერა დაასრულა.

2017 წელს, ნეიმარის წასვლის შემდეგ, ბარსამ დორტმუნდიდან €105 მილიონად ახალგაზრდა ფრანგი შეიძინა. უსმანზე დიდი ავანსები გაიცა, მაგრამ ტრავმიანობითა და უდისციპლინობით მან კლუბს იმედები გაუცრუა. ჩავი ერნანდესის ხელში დემბელე ათამაშდა და კლუბისთვის შედარებით მნიშვნელოვანი წევრი გახდა, მაგრამ მოულოდნელად, მან გუნდის დატოვება მოითხოვა და პარი სენ-ჟემრენში €50 მილიონად გაიყიდა.