დღეს, თბილისის დროით 21:55 და 23:59 საათებზე ჩემპიონთა ლიგის ჯგუფური ეტაპის მეხუთე ტურის დასკვნითი ნაწილი გაიმართება. გადავავლოთ თვალი E-H ჯგუფებში არსებულ მდგომარეობას. ფაქტია, დღეს გველის ბევრი საინტერესო დაპირისპირება, მოკლედ, ვიწყებთ პრევიუს.

E ჯგუფი

სევილია-ჩელსი (23:59)

კრასნოდარი-რენი (21:55)

ჯგუფის გამოკვეთილი ფავორიტებისა და ევროპა ლიგის საგზურისთვის მებრძოლი გუნდების შეხვედრა. "სევილია" და "ჩელსი", რომლებსაც აქვთ 10-10 ქულა გაარკვევენ პირველადგილოსანის ვინაობას, "კრასნოდარი" და "რენი" კი მე-3. ამ ჯგუფში გამოკვეთილად ჩანს ორი გუნდის დომინირება დანარჩენ ორზე.

F ჯგუფი

დორტმუნდი-ლაციო (23:59)

ბრიუგე-ზენიტი (23:59)

ჯგუფი, რომელშიც ცნობილი ჯერჯერობით არაფერია, იმის გარდა, რომ "ზენიტს" პლეი-ოფში ვერ ვიხილავთ. ამ გუნდს აქვს ერთი ქულა და მეორე ადგილამდე დაშორება ამ დროისთვის 7 ქულას შეადგენს. სანქტ-პეტერბურგელების დამარცხების შემთხვევაში, "ბრიუგე" 1/8 ფინალში გასვლის რეალური პრეტენდენტი ხდება.

რაც შეეხება ლიდერების დაპირისპირებას, "დორტმუნდს" აქვს ცხრა ქულა, "ლაციოს" - რვა. ის გუნდი, რომელიც გაიმარჯვებს დღეს, გაიფორმებს პლეი-ოფის საგზურს, ფრეს დაფიქსირებისა და ბელგიელების გამარჯვების შემთხვევაში კი ჯგუფში მდგომარეობა არნახულად დაიძაბება.

F ჯგუფი

იუვენტუსი-დინამო კიევი (23:59)

ფერანცვაროში-ბარსელონა (23:59)

"ბარსელონა" და "იუვენტუსი" უკვე არიან პლეი-ოფში, პრინციპში ეს ისედაც მოსალოდნელი იყო. აღნიშნულ გუნდებს გასარკვევი აქვთ პირველადგილოსანის ვინაობა, მაგრამ დღეს დიდი ალბათობით ეს ვერ მოხერხდება, რადგან "ბლაუგრანა" და "სინიორაც" ჯგუფის აუტსიაიდერებს ხვდებიან.

ევროპა ლიგის საგზურისთვის იბრძვის როგორც "დინამო", ისე ლაშა დვალის "ფერენცვაროშიც". ვნახოთ, რომელი გუნდი გააგრძელებს ევროსარბიელზე ბრძოლას გაზაფხულზე. მოკლედ, ამ ჯგუფში ყველაფერი გაირკვევა უშუალოდ ბოლო ტურში, დღეს კი კატალონიელებისა და "შავ-თეთრების" გოლების ფეერიას ველით.

H ჯგუფი

მანჩესტერი-პსჟ (23:59)

ისტანბული-ლაიფციგი (21:55)

იმ შემთხვევაში, თუ "მანჩესტერი" კიდევ ერთხელ დაამარცხებს "პარი სენ-ჟერმენს", ინგლისური გუნდი პლეი-ოფში დროზე ადრე აღმოჩნდება. სტუმრები კი თავის მხრივ მნიშვნელოვნად გაირთულებენ საქმეს, რადგან "ლაიფციგს" მათ მსგავსად 6 ქულა აქვს. მოკლედ, დღეს, "პსჟ"-ს მოგება სჭირდება.

საინტერესო იქნება ედინსონ კავანის ხილვა პარიზელების წინააღმდეგ, რომელთა შემადგენლობაში ის კლუბის ისტორიაში ყველა დროის საუკეთესო ბომბარდირი გახდა. საინტერესო ფაქტი: ჯგუფიდან გასვლის თეორიულ შანსს ინარჩუნებს "ისტანბულიც", რომელსაც 3 ქულა აქვს. ვნახოთ, ვინ დარჩება მოგებული.