ოფიციალურად: ევროპის სუპერლიგა დაარსდა

ის, რაც დიდი ხანია იწერება ვარაუდის დონეზე, ახლა ოფიციალურადაც დადასტურდა.

ოფიციალურ განცხადებაში ნათქვამია, რომ ევროპის წამყვანმა 12-მა კლუბმა მოილაპარაკა და ახალი, შუა კვირებში გასამართი ევროტურნირი, ევროპის სუპერლიგა დააარსა.

ეს 12 კლუბია: „მილანი“, „არსენალი“, „ატლეტიკო“, „ჩელსი“, „ბარსელონა“, „ინტერი“, „იუვენტუსი“, „ლივერპული“, „მანჩესტერ სიტი“, „მანჩესტერ იუნაიტედი“, „რეალი“ და „ტოტენჰემი“.

უახლოეს პერიოდში, მათ შეუერთდებათ კიდევ 3 კლუბი, რომელიც ასევე დამფუძნებლის სტატუსს მოიპოვებს. ტურნირის მმართველები სწორედ ეს კლუბები იქნებიან.

ფორმატი ჯერ ოფიციალურად დამტკიცებული არ არის, თუმცა გავრცელებული ინფორმაციით, ხელმძღვანელი კლუბების გარდა, ტურნირს ყოველწლიურად მოწვეული სტუმრის სტატუსის მქონე გუნდებიც შეუერთდებიან.

სუპერლიგის პრეზიდენტი „რეალის“ მეთაური, ფლორენტინო პერესი იქნება, რომელიც უახლოეს პერიოდში ფიფასა და უეფასთან კომუნიკაციას და თანამშრომლობის შეთავაზებას აპირებს.

დღეს უეფამ ოფიციალურად დაადასტურა, რომ გუნდებს, რომლებიც სუპერლიგის ორგანიზაციაში იღებენ მონაწილეობას, მისი ეგიდით გასამართი ტურნირებიდან მოკვეთავს. ამიტომ ჯერჯერობით უცნობია, როგორ განვითარდება მოვლენები.