ორხელისუფლიანობა დაეცა! 2002 წლის შემდეგ, პორტუგალიის ჩემპიონი არც პორტუ გახდა და არც ბენფიკა

პორტუგალიის პრიმეირა ლიგას ახალი ჩემპიონი ჰყავს.

ჩემპიონატის 32-ე ტურში ლისაბონის „სპორტინგმა“ შინ „ბოავიშტა“ დაამარცხა და ლიგის დასრულებამდე ორი ტურით ადრე, ჩემპიონობა ოფიციალურად გაინაღდა.

მისი უახლოესი მდევარი „პორტუა“, რომელსაც 8 ქულით ნაკლები აქვს და 2 ტურში ამ ჩამორჩენის აღმოფხვრა მათემატიკრუადაც შეუძლებელი იქნება.

აღსანიშნავია, რომ „სპორტინგისთვის“ ეს ისტორიაში მე-19 ჩემპიონობაა, თუმცა გუნდი მის მოპოვებას თითქმის 20 წლის მანძილზე ვერ ახერხებდა.

უკანასკნელად, დედაქალაქელებმა ტიტულის მოპოვება 2001/02-სეზონში მოახერხეს. მას შემდეგ, პორტუგალიაში მხოლოდ ორი გუნდი მეფობდა - „პორტუ“ და „ბენფიკა“.

2002 წლის შემდეგ, პორტუგალიაში ჩემპიონი 18-ჯერ გამოვლინდა, 11-ჯერ თასის მოპოვება „პორტუმ“ მოახერხა, 7-ჯერ კი - „ბენფიკამ“.

პორტუგალიის ყველაზე ტიტულოვანი გუნდი „ბენფიკაა“ (37), მეორე ადგილს „პორტუ“ იკავებს (29), „სპორტინგი“ კი ლოგიკურად მესამეა, აწ უკვე 19 ტიტულით.