ევერტონი ანჩელოტის ერთ-ერთ შემცვლელად სტივენ ჯერარდს მოიაზრებს - არა, არ მოგეჩვენათ
„რეინჯერსის“ დამრიგებელი, სტივენ ჯერარდი, „ევერტონის“ მთავარი მწვრთნელობის ერთ-ერთ კანდიდატად მოიხსენიეს.
The Athletic-ის ინფორმაციით, კარლო ანჩელოტის შემცვლელად, „ევერტონი“ შემდეგ ვარიანტებს განიხილავს: რაფაელ ბენიტესს, დევიდ მოიესს, პაულო ფონსეკას, ერიკ ტენ ჰაგს და რობერტო მარტინესს.
ჯერარდი „ლივერპულის“ აღზრდილია და კლუბის ღირსებას 1998-2015 წლებში იცავდა. წითლებთან ერთად მან ორჯერ მოიგო ინგლისის თასი და სუპერთასი, სამჯერ ინგლისის ლიგის თასი, ასევე იმარჯვა ჩემპიონთა ლიგაზე, უეფას თასზე და ორჯერ - უეფას სუპერთასზე.
გასულ სეზონში, ჯერარდმა „რეინჯერსი“ შოტლანდიის ჩემპიონი გახადა და „სელტიკის“ მრავალწლიანი ჰეგემონია დაამხო.
„ევერტონის“ დამრიგებელი კარლო ანჩელოტი კი სამუშაოდ თავის ყოფილ გუნდში, მადრიდის „რეალში“ გადავიდა, რომელსაც 2013-2015 წლებში წვრთნიდა და გუნდს ჩემპიონთა ლიგაც მოაგებინა.