უხვგოლიანი და დრამატული მატჩი — ჰოლანდიამ უკრაინა დაამარცხა! [VIDEO]

2020 წლის ევროპის ჩემპიონატის C ჯგუფის პირველი ტურის ეგიდით, ერთმანეთს ჰოლანდიისა და უკრაინის ნაკრებები დაუპირისპირდნენ.

აღნიშნული შეხვედრა საკმაოდ დრამატული აღმოჩნდა, რომელიც ნიდერლანდელთა გამარჯვებით დასრულდა - 3:2.

უგოლო პირველი ტაიმის შემდეგ, ანგარიში 52-ე წუთზე ჟორჟინიო ვეინალდუმმა გახსნა, რასაც რამდენიმე წუთში ვუტ ვეგჰორსტის გოლი მოჰყვა და ჰოლანდიელები ორბურთიანი ჰანდიკაპით გავიდნენ წინ.

მიუხედავად ამისა, უკრაინელებმა ფარ-ხმალი არ დაყარეს და წონასწორობის აღდგენა მოახერხეს - 4-წუთიან მონაკვეთში, 75-ე და 79-ე წუთებზე, ჯერ ანდრეი იარმოლენკომ გამოიჩინა თავი, ხოლო შემდეგ რომან იარემჩუკმა.

თუმცა, საბოლოო შედეგი მაინც ჰოლანდიამ დააფიქსირა - 85-ე წუთზე, დენზელ დამფრისმა გაიტანა და თავის გუნდს უმნიშვნელოვანესი სამი ქულა მოუტანა.