რამდენი იქნება მემფის დეპაის გამოსასყიდი თანხა ბარსელონაში?

როგორც იცით, „ბარსელონამ“ „ლიონიდან“ ჰოლანდიელი თავდამსხმელი, მემფის დეპაი, თავისუფალი აგენტის სტატუსით დაიმატა.

როგორც ესპანური გამოცემა AS იტყობინება, ნიდერლანდელი შემტევის გამოსასყიდი თანხა 400 მილიონი ევრო იქნება.

27 წლის მემფისმა „ბარსელონასთან“ კონტრაქტი 2024 წლის ზაფხულამდე გააფორმა. თუმცა მისი პრეზენტაცია „კამპ ნოუზე“ ევრო 2020-ს დასრულების შემდეგ შედგება. 

ჯერ კიდევ მაისში გავრცელდა ინფორმაცია, რომ დეპაიმ „ბარსელონასთან“ კონტრაქტი შეათანხმა და მისი წლიური ხელფასი 5 მილიონი ევრო იქნება. „ლიონის“ მაისურს მემფისი 2017 წლიდან ატარებდა და მისი კონტრაქტი 2021 წლის 30 ივნისამდე იყო ძალაში.

2020/21-სეზონში დეპაიმ ლიგა 1-ს 36 მატჩში 20 გოლი და 10 საგოლე გადაცემა მიითვალა.