კარლო ანჩელოტის რეალის შეტევის გასაძლიერებლად გუნდში თავისი ყოფილი შეგირდის მიყვანა სურს - არა, ხამესის არა

კარლო ანჩელოტი მადრიდის „რეალის“ გაძლიერების ვარიანტების ძიებაში იმყოფება.

ინტერნეტ-გამოცემა Goal.com-ის ინფორმაციით, იტალიელმა სპეციალისტმა თვალი თავის ყოფილ შეგირდს, რიჩარლისონს დაადგა და ფიქრობს, რომ ბრაზილიელი შემტევი მადრიდის „რეალის“ შესუსტებულ შეტევის ხაზს საგრძნობლად გააძლიერებს.

ანჩელოტის და რიჩარლისონს ერთად „ევერტონში“ აქვთ ნამუშევარი და ბრაზილიელი გუნდის ერთ-ერთი წამყვანი ფეხბურთელი იყო.

ამჟამად, რიჩარლისონი კოპა ამერიკაზეა კონცენტრირებული, სადაც მისი ბრაზილიის ნაკრები ფინალშია გასული და 11 ივლისს არგენტინას დაუპირისპირდება.

ზემოთხსენებული გამოცემა ხაზს უსვამს, რომ მადრიდის „რეალმა“ „ევერტონს“ რიჩარლისონის თაობაზე შესაძლოა სანაკრებო ბატალიების შემდეგ მიმართოს.

„ევერტონის" მაისურით რიჩარლისონმა 119 მატჩი მიიღო მონაწილეობა და 42 გოლსა და 9 საგოლე გადაცემას მოუყარა თავი.