VIDEO: ნამდვილი დრამა ბაიარენაზე — დორტმუნდმა ლევერკუზენი 7-გოლიან თრილერში დაამარცხა
გერმანიის ჩემპიონატის მე-4 ტურის ეგიდით, "ლევერკუზენმა" შინაურ კედლებში "დორტმუნდს" უმასპინძლა.
აღნიშნული დაპირისპირება ბორუსიელთა გამარჯვებით დასრულდა - 4:3.
შეხვედრაში ანგარიში მე-9 წუთზე "ფარმაცევტების" ნახევარმცველმა, ფლორიან ვირტცმა გახსნა, 37-ე წუთზე კი ერლინგ ჰოლანდმა წონასწორობა აღადგინა, ზუსტად ორ წუთში ჯუდი ბელინგემს გოლი გაუუქმეს - მსაჯმა თამაშის წესის დარღვევა დააფიქსირა.
არჩათვლილი გოლის შემდეგ, "დორტმუნდს" აქეთ გაუტანეს - პირველი ტაიმის ბოლოს თავი პატრიკ შიკმა გამოიჩინა და "ლევერკუზენი" კვლავ წინ გაიყვანა.
მეორე ტაიმის სტარტზევე, 49-ე წუთზე, იულიან ბრანდტმა ანგარიში კიდევ ერთხელ გაათანაბრა, 55-ე წუთზე კი მუსა დიაბიმ მასპინძლები კვლავ დააწინაურა.
საბოლოო ჯამში, ნამდვილ თრილერში გამარჯვება მაინც "დორტმუნდს" დარჩა - 5 წუთიან მონაკვეთში, 71-ე და 75-ე წუთებზე, ჯერ რაფაელ გერეირომ შეარხია მეტოქის კარის ბადე, ხოლო შემდეგ ერლინგ ჰოლანდმა გაიტანა, რომელმაც დუბლი გაიფორმა და თავის გუნდს 3 ქულაც მოუტანა.
ამ გამარჯვების შემდეგ, "დორტმუნდი" ბუნდესლიგის სატურნირო ცხრილში 9 ქულით მეორე ადგილს იკავებს, "ლევერკუზენი" კი 7 ქულით მე-5 პოზიციაზეა.
ვიდეომიმოხილვა