საქართველოს უმაღლესი ლიგის მე-6 ტურის დასკვნით შეხვედრაში "დინამო თბილისმა" ფოთის "კოლხეთს" უმასპინძლა და მინიმალური სხვაობით დაამარცხა. მთელი პირველი ტაიმის განმავლობაში სრულ უპირატესობას "დინამო" ფლობდა. ფოთელებმა რამდენჯერმე შეძლეს მეტოქის მოედანზე გადასვლა, თუმცა ამას ხიფათი არ მოჰყოლია. მიუხედავად უდიდესი ზეწოლისა, "დინამომ" პირველი ხიფათის შექმნა სასტარტო სასტვენიდან ნახევარი საათის შემდეგ შეძლო. 28-ე წუთზე, საჯარიმოში მყოფმა, შერგელაშვილმა დაარტყა კარში - ფოთელ მეკარეს ბურთის დაჭერა არ გასჭირვებია. 1 წუთში ცინცაძე შორი მანძილიდან ურტყამდა, ბურთს მიმართულება ერთი შეხებით ნიკა საბანაძემ შეუცვალა და საქართველოს ჩემპიონატში მორიგი გოლი გაიტანა. 44-ე წუთზე პაპუნაშვილმა საჯარიმოს მისადგომებიდან ძლიერად დაარტყა - ბურთი კარს მეკარისგან მარცხენა დაბალ კუთხეში მცირე მანძილით ასცდა. შესვენების შემდეგ ფოთელები გააქტიურდნენ და 59-ე წუთზე ლუკა გეგუჩიამ გოლიც გაიტანა. ზუსტად ერთ წუთში პაპუნაშვილი ურტყამდა საჯარიმოს ხაზიდან - ბურთი მეკარე სეფიაშვილმა მოიგერია. 72-ე წუთზე შეცვლაზე შემოსულმა გიორგი ჩირგაძემ კვლავ წინ გაიყვანა "დინამო". საჯარიმოში მყოფმა შემტევმა მეკარისგან მარცხენა დაბალ კუთხეში გაიტანა. 82-ე წუთზე შეტევაში სიჭინავას უხეირო თამაშის გამო "კოლხეთმა" კონტრშეტევა მიიღო, რომლის დაგვირგვინებაც ლაშა შერგელაშვილს შეეძლო, თუმცა მეკარემ ახლო მანძილიდან მოიგერია. იხილეთ მატჩის ამსახველი ფოტომასალა ფოტოგრაფი: დავითი აბუთიძე [jwplayer player="1" mediaid="69701"] "დინამო თბილისი" 2:1 ფოთის "კოლხეთი" გოლები: საბანაძე, 29, ჩირგაძე, 72 - გეგუჩია, 59. "დინამო": დაუშვილი, თოთაძე, ჭანტურია, ცინცაძე, პაპუნაშვილი, საბანაძე(ჯიქია, 83), პაპავა, პარუნაშვილი(მჭედლიშვილი, 90), ლობჟანიძე(ჩირგაძე, 59), შერგელაშვილი, ძარია. "კოლხეთი": სეფიაშვილი, კილასონია, ჩადუნელი, თევზაძე, ლემონჯავა, გეგუჩია, ჯიქია, ჯიშკარიანი(სიჭინავა,56), ამბროლაძე, ქორჩილავა(კაკულია, 80), ბარამიძე(სიჭინავა, 76). გაფრთხილება: კილასონია, 62, ბარამიძე, 70, შ.ჯიქია, 70.