პოგბა, რეალში ან ბარსელონაში - რაიოლამ აუქციონი ჩანიშნა
"მანჩესტერ იუნაიტედის" ცენტრალური ნახევარმცველის, პოლ პოგბას სხვა გუნდში გადასვლა საკმაოდ აქტუალურია. El Nacional-ის თანახმად, ფრანგისთვის ბრძოლაში ფავორიტები მადრიდის "რეალი" და "ბარსელონა" არიან.
რაც შეეხებათ ტურინის "იუვენტუსსა" და "პარი სენ-ჟერმენს", აღნიშნული გუნდები "წითელი ეშმაკების" ჰავბეკის სატრანსფერო ამბებში ჯერჯერობით არ აქტიურობენ.
მინო რაიოლა შეხვდება როგორც ფლორენტინო პერესს, ისე ხოან ლაპორტას, მოისმენს ორივე პრეზიდენტის პოზიციას, შემდეგ კი "მანკუნიანელების" ექვსიანზე აუქციონს მოაწყობს.
იტალიელი აგენტი აცნობიერებს იმ ფაქტს, რომ 28-წლის შუახაზელი თავის კარიერაში მსხვილ კონტრაქტს ხელს აწერს ბოლოჯერ და აქედან გამომდინარე, ის მაქსიმალურად სარფიანი წინადადების მიღების მოლოდინშია.
აქვე დავამატებთ, პოგბას ამჟამინდელი ხელშეკრულება "მანჩესტერთან" გათვლილია 2022 წლამდე, მის გახანგრძლივებას კი ფეხბურთელი არ ჩქარობს. ყველაფერი ზაფხულში გადაწყდება.
