როგორც იქნა! 9-წლიანი სერია შეწყვეტილია - საქართველომ სტუმრად კოსოვო დაამარცხა
მსოფლიო ჩემპიონატის შესარჩევი ეტაპის მატჩში საქართველომ სტუმრად კოსოვო დაამარცხა.
შეხვედრა სტადიონ „ფადილ ვოკრიზე“ პრიშტინაში გაიმართა და საქართველოს გამარჯვებით 2:1 დასრულდა.
ანგარიში მე-11 წუთზე თორნიკე ოქრიაშვილმა გახსნა, როცა მეკარის შეცდომით ისარგებლა და ჩვენი ნაკრები დააწინაურა.
45-ე წუთზე მურიქიმ პენალტი ზუსტად შეასრულა და საქართველოს ტაიმის დასასრული ჩაუშხამა.
მეორე ნახევარი პრაქტიკულად უმომენტოდ გავატარეთ, თუმცა 82-ე წუთზე ვილი სანიოლის ცვლილებებმა გაამართლა - შეცვლაზე შემოსულმა ირაკლი აზაროვმა საჯარიმოში ზურიკო დავითაშვილი მოძებნა, რომელმაც თავური დარტყმით ბურთი მეტოქის კარში გადაგზავნა.
ამრიგად, საქართველომ მსოფლიო საკვალიფიკაციო ეტაპზე 9-წლიანი მოუგებელი სერია შეწყვიტა და ნანატრი გამარჯვება მოიპოვა.
სამწუხაროდ, ჯგუფის თვალსაზრისით ამას დიდი მნიშვნელობა არ აქვს, თუმცა საქართველომ 4 ქულა დააგროვა და მეოთხე ადგილზე კოსოვო ჩაანაცვლა.
