პსჟ-ში რამოსის წლიური ხელფასის ოდენობა გასაჯაროვდა — რეალში ესპანელი ორჯერ მეტს ითხოვდა
ცნობილი გახდა, თუ რამდენს გამოიმუშავებს "პარი სენ ჟერმენში" ცენტრალური მცველი, სერხიო რამოსი.
როგორც ავტორიტეტული ფრანგული გამოცემა L’Équipe წერს, ყველა გადასახადისა და მოსაკრებლის შემდეგ, 35 წლის ესპანელი წლიურად 6 მილიონ ევროს გამოიმუშავებს.
გავრცელებული ინფორმაციით, გამოცდილ უკანახაზელს პარიზულ კლუბში ერთ-ერთი ყველაზე მაღალი ხელფასი აქვს.
ყველა იმ ფეხბურთელის მსგავსად, ვინც "პსჟ"-მ ზაფხულის სატრანსფერო ბაზარზე დაიმატა, არც რამოსს მიუღია კონტრაქტის გაფორმებისთვის ბონუსი.
საინტერესოა, რომ სერხიო, რომელსაც "რეალთან" კონტრაქტის ვადა გასული სეზონის დასრულების შემდეგ ამოეწურა, მადრიდელებისგან წლიური ანაზღაურების სახით 12 მილიონს ითხოვდა.
ჯერჯერობით, რამოსს პარიზული კლუბის რიგებში სადებიუტო მატჩიც კი არ ჩაუტარებია, რადგან დღემდე მუხლთან დაკავშირებულ პრობლემებს ებრძვის.
