კომანის შემდეგ გნაბრიც — ბაიერნი გუნდის წამყვან ფეხბურთელებს ხელფასებს საგრძნობლად უზრდის
"ბაიერნი" უახლოეს პერიოდში თავდამსხმელ სერჟ გნაბრისთან მოქმედი კონტრაქტის გახანგრძლივებას გეგმავს.
საქმე ეხება ახალ გრძელვადიან ხელშეკრულებას, გაზრდილი ხელფასით. როგორც ცნობილი ჟურნალისტი, ფლორიან პლეტენბერგი იტყობინება, გერმანელი გარემარბი წლიურად დაახლოებით 15 მილიონ ევროს გამოიმუშავებს + ბონუსები.
პლეტენბერგის ცნობით, გნაბრისაც იმხელა შემოსავალი ექნება, რამდენიც კინგსლი კომანს - "რეკორდმაისტერი" ახალ კონტრაქტს ამ უკანასკნელსაც უფორმებს.
აქამდე გავრცელებული ინფორმაციით, კომანი შესაბამისი გადასახადების გადახდამდე წლიურად 17 მილიონ ევროზე მეტს გამოიმუშავებს და მიუნხენში მასზე მაღალი ხელფასი მხოლოდ ორ ფეხბურთელს ექნება - მანუელ ნოიერსა და რობერტ ლევანდოვსკის.
მიმდინარე სეზონში 26 წლის გნაბრიმ ყველა ტურნირზე ერთად "ბაიერნის" რიგებში 25 მატჩი ჩაატარა, 11 გოლი გაიტანა და 7 შედეგიანი პასი გააკეთა, ხოლო 25 წლის კომანმა 17 შეხვედრაში მეტოქის კარი 5-ჯერ აიღო, ორ ასისტთან ერთად.
ცნობილია ხელფასი, რომელსაც კომანი ბაიერნში ახალი კონტრაქტის მიხედვით მიიღებს