ფედერიკო კიეზას ოპერაცია წარმატებით ჩაუტარდა - რამდენს გამოტოვებს იტალიელი შემტევი?

„იუვენტუსის“ და იტალიის ნაკრების შემტევს, ფედერიკო კიეზას, ოპერაცია ჩაუტარდა.

ფეხბურთელს ქირურგიული ჩარევა იმის გამო დასჭირდა, რომ „რომასთან“ სერია ა-ს 21-ე ტურის მატჩში მან მუხლის ჯვარედინი მყესები გაიწყვიტა.

„იუვენტუსის“ ოფიციალური ვებ-გვერდი იტყობინება, რომ კიეზას ოპერაციამ წარმატებით ჩაიარა და ფეხბურთელი სარეაბილიტაციო პროცესს უკვე უახლოეს პერიოდში შეუდგება.

თუმცა, ამ სეზონში კიეზას დაბრუნება ნაკლებად სავარაუდოა - მის სრულად მწყობრში დაბრუნებას დაახლოებით შვიდ თვემდე დასჭირდება.

ამ სეზონში ფედერიკომ სერია ა-ს 14 მატჩში მიიღო მონაწილეობა და 2 გოლის გატანა მოახერხა. 

მარტში იტალიის ნაკრები მუნდიალის გასასვლელად პლეი-ოფში ჯერ ჩრდილოეთ მაკედონიას დაუპირისპირდება და მოგების შემთხვევაში, თურქეთი/პორტუგალიის წყვილში გამარჯვებულს დაუპირისპირდება. ამ მატჩებში ევროპის ჩემპიონებს კიეზა ვერ დაეხმარება.