ოფიციალურად: ბარსელონამ ობამეიანგის ტრანსფერი დაადასტურა - გაბონელს კონტრაქტში მაღალი გამოსასყიდი თანხა ჩაუწერეს

გაბონელმა ფორვარდმა, პიერ-ემერიკ ობამეიანგმა „ბარსელონასთან“ გააფორმა კონტრაქტი.

ინფორმაციას კატალონიური გუნდის ოფიციალური ვებ-გვერდი ადასტურებს. ობამეიანგმა „ბარსასთან“ 3.5-წლიანი ხელშეკრულება შეათანხმა.

როგორც ცნობილია, 32 წლის შემტევმა „არსენალთან“ კონტრაქტი ორმხრივი შეთანხმების საფუძველზე გაწყვიტა და „ბარსელონაში“ თავისუფალი აგენტის სტატუსით გადავიდა.

საინტერესოა, რომ „ბარსელონამ“ ფეხბურთელს გამოსასყიდი თანხაც ჩაუწერა კონტრაქტში, რომელიც 100 მლნ ევროს შეადგენს.

შეგახსენებთ, რომ 2021 წლის 14 დეკემბერს პიერ-ემერიკ ობამეიანგს „არსენალის“ კაპიტნობა ჩამოართვეს და გუნდსაც ჩამოაშორეს, ასეთი გადაწყვეტილება კლუბმა ხშირი დისციპლინარული დარღვევების გამო მიიღო.