ხედირა ბრაზილიასთან 7:1-ზე: "ლიოვმა შესვენებაზე თქვა, რომ თუ ვინმე ხუმრობას დაიწყებდა, ფინალში არ ათამაშებდა"
სამი ხედირამ ისაუბრა, თუ როგორ განაწყო გერმანიის ნაკრების მთავარმა მწვრთნელმა, იოაჰიმ ლიოვმა გუნდი 2014 წლის მსოფლიო ჩემპიონატზე ბრაზილიასთან გამართული მატჩის შესვენებაზე.
მოგეხსენებათ, აღნიშნული შეხვედრა 1/2 ფინალური ეტაპის ეგიდით გაიმართა და "ბუნდესთიმის" გამანადგურებელი გამარჯვებით დასრულდა - 7:1. პირველი ტაიმი გერმანელებმა 5:0 მოიგეს.
"იმ დღეს ყველაზე სერიოზული ლიოვი იყო. შესვენებაზე გვითხრა, რომ თუ ვინმე თავს დაზოგავდა ან 5:0-ის გამო ხუმრობას დაიწყებდა, უმალვე შეცვლიდა და ფინალში არ ათამაშებდა".
"გვთხოვა, თამაშს სერიოზულად მივდგომოდით, ბრაზილიის ნაკრებისთვის კი პატივი გვეცა. და კიდევ უფრო მეტი - ბრაზილიელი გულშემატკივრებისა და მათი ქვეყნისთვის", - ციტირებს ხედირას სიტყვებს ESPN-ი.
მოგეხსენებათ, "სელესაოს" გაცამტვერების შემდეგ, გერმანიამ ფინალში არგენტინა (1:0) დაამარცხა და მსოფლიო ჩემპიონი გახდა.