VIDEO: ბენზემას შოუ გრძელდება! რეალს მალიორკასთან 3:0 გამარჯვება მძიმე ფასად დაუჯდა

ლა ლიგის 28-ე ტურში მადრიდის „რეალმა“ სტუმრად „მალიორკა“ გაანადგურა.

შეხვედრა „მალიორკა ესტადიზე“ გაიმართა და სტუმართა გამარჯვებით 3:0 დასრულდა.

მატჩში დუბლი+ საგოლე გადაცემა კარიმ ბენზემამ მიითვალა, რომელმაც „პსჟ-სთან“ მატჩის შემდეგ შოუ დღესაც გააგრძელა. ერთი გოლი კი „რეალის“ მეორე საუკეთესო ბომბარდირმა, ვინისიუს ჯუნიორმა გაიფორმა.

მატჩის მიწურულს „რეალს“ 20 მარტს გასამართი კლასიკოს წინ ხასიათი მაინც გაუფუჭდა - დაზიანებების გამო შეცვლა ჯერ ფერლან მენდიმ ითხოვა, რამდენიმე წუთში კი მატჩის გაგრძელება მთავარმა გმირმა, კარიმ ბენზემამ ვერ მოახერხა. მათი ტრავმების სიმძიმე ხვალ-ზეგ გახდება ცნობილი.

„რეალმა“ 66 ქულა დააგროვა და უახლოეს მდევარ „სევილიას“ 10 ქულით უსწრებს, „ბარსელონას“ კი 15-ით, თუმცა კატალონიელებს ერთი მატჩით ნაკლები აქვთ ჩატარებული.