VIDEO: მორიგი სიგიჟე სანტიაგო ბერნაბეუზე — რეალმა სიტი დამატებით დროში დაამარცხა და ფინალში გავიდა!

ჩემპიონთა ლიგის საპასუხო 1/2 ფინალური მატჩის ეგიდით, მადრიდის "რეალმა" "სანტიაგო ბერნაბეუზე" "მანჩესტერ სიტის" უმასპინძლა.

დრამატული დაპირისპირება მადრიდული გრანდის გამარჯვებით დასრულდა - 3:1 დ.დ (პირველი მატჩი - 3:4).

უგოლო პირველი ნახევრის შემდეგ ანგარიში 73-ე წუთზე რიად მაჰრეზმა გახსნა და "ქალაქელები" ორი შეხვედრის ჯამში ორბურთიანი სხვაობით გაიყვანა წინ.

პეპ გვარდიოლას შეგირდებს საქმე ბოლომდე მშვიდად მიჰყავდათ, თუმცა "სამეფო კლუბის" ზღაპარი 90-ე წუთზე დაიწყო - როდრიგომ ჯერ წონასწორობა აღადგინა, ზუსტად ერთ წუთში კი მეორე გოლიც შეაგდო და თამაში დამატებით დროში გადაიყვანა.

ოვერტაიმის მე-5 წუთზე (95-ე წუთი) "სიტის" კარში თერთმეტმეტრიანი დაინიშნა, რომელიც კარიმ ბენზემამ უზადოდ შეასრულა და "ბლანკოსი" ჩემპიონთა ლიგის ფინალში გაიყვანა.

ასე და ამგვარად, ევროპის მთავარი საკლუბო ტურნირის მიმდინარე გათამაშების გადამწყვეტ მატჩში ერთმანეთს "ლივერპული" და "რეალი" დაუპირისპირდებიან.