ლაიფციგმა ბაიერნის პირველი შეთავაზება იუარა, სასურველი თანხა დაასახელა და დედლაინიც დააწესა
"ლაიფციგის" ხელმძღვანელობა ნახევარმცველ კონრად ლაიმერის "ბაიერნში" გაშვებაზე ჯერჯერობით უარს აცხადებს.
მიუნხენელებმა 25 წლის ავსტრიელის თაობაზე 20 მილიონ ევროიანი შეთავაზება გააკეთეს, მაგრამ უარი მიიღეს.
როგორც გავლენიანი გერმანული გამოცემა Bild-ი წერს, "ლაიფციგს" თავისი ფეხბურთელის სანაცვლოდ 30 მილიონის მიღება სურს, თანაც ერთიანად და არა ნაწილ-ნაწილ.
გარდა ამისა, კლუბმა დედლაინიც დააწესა - 30 ივლისამდე, როცა გერმანიის სუპერთასი გაიმართება. ამ თარიღის შემდეგ, ტრანსფერი დაიბლოკება.
თავის მხრივ, კონრადმა კონტრაქტის გახანგრძლივება არ ისურვა და თქვა, რომ "ბაიერნში" გადასვლა უნდა - მიმდინარე ან მომავალ წელს. "ლაიფციგი" მზადაა იგი მომავალ ზაფხულს უფასოდ დაკარგოს, თუ მის პირობებს არ დააკმაყოფილებენ.
გასულ სეზონში ლაიმერმა ყველა ტურნირზე ერთად 42 მატჩი ჩაატარა, 5 გოლი გაიტანა და 6 შედეგიანი გადაცემაც ჩაიწერა საკუთარ აქტივში.