VIDEO: ლევანდოვსკი ბარსელონას უკვე შეუერთდა და ახალ თანაგუნდელებს მიესალმა
"ბარსელონას" ახალწვეული, რობერტ ლევანდოვსკი, რომელიც კატალონიურ გრანდში "ბაიერნიდან" გადავიდა, გუნდს აშშ-ში, სადაც "ლურჯ-ბროწეულისფრები" წინასასეზონო შეკრებაზე იმყოფებიან, სადილის დროს შეუერთდა და ახალ თანაგუნდელებს მიესალმა.
მოგეხსენებათ, 33 წლის პოლონელი სუპერვარსკვლავი "რეკორდმაისტერში" 2014 წლიდან ირიცხებოდა. რობერტმა მიუნხენელთა მაისურით ამ დროის მანძილზე 375 მატჩში მიიღო მონაწილეობა, 344 გოლი გაიტანა და 72 შედეგიანი გადაცემა ჩაიწერა საკუთარ აქტივში.
მოგეხსენებათ, ლევანდოვსკის ტრანსფერი "ბაიერნმა" და "ბარსელონამ" რამდენიმე დღის წინ დაადასტურეს, თავად რობერტმა კი კატალონიელებთან 3-წლიან კონტრაქტს მოაწერა ხელი, თანამშრომლობის კიდევ ერთი სეზონით გაგრძელების შესაძლებლობით.
ლევანდოვსკი 2008 წლიდან პოლონეთის ეროვნულ ნაკრებში თამაშობს. ამჟამად იგი გუნდის კაპიტანია და საერთო ჯამში 131 შეხვედრა აქვს ჩატარებული (76 გოლი, 28 ასისტი).
