ოფიციალურად: კაზემირო მანჩესტერ იუნაიტედის ფეხბურთელია - ბრაზილიელს რეალში გამოსამშვიდობებელი ცერემონია ექნება

მადრიდის „რეალმა“ და „მანჩესტერ იუნაიტედმა“ კარლოს ენრიკე კაზემიროს ტრანსფერზე შეთანხმებას მიაღწიეს.

შეთანხმების შესახებ ორივე კლუბმა ოფიციალურად დაადასტურა, ბრაზილიელი ფეხბურთელი „მანჩესტერს“ 72+13 მილიონ ევროდ შეუერთდება და 4+1-წლიან კონტრაქტს გააფორმებს. 

საკუთარ განცხადებაში „რეალი“ ბრაზილიელ ფეხბურთელს მადლობას გამოუთქვამს და გუნდის ლეგენდად მოიხსენიებს. 

კაზემირო „რეალს“ 2013 წლის იანვარში „სან პაულუდან“ შეუერთდა და გუნდის ყველა ბოლოდროინდელი წარმატების უცვლელი და უმნიშვნელოვანესი წევრი იყო.

ამ 9 სეზონში კაზემირომ „რეალთან“ ერთად 18 ტიტულის მოგება შეძლო და 2022 წლის ოქროს ბურთის 30 ნომინანტს შორის მოხვდა.

ორშაბათს, 22 აგვისტოს, კაზემირო „რეალის“ ბაზაზე გამოსამშვიდობებელ ცერემონიას გამართავს, რომელში მონაწილეობასაც ფლორენტინო პერესი მიიღებს.

ამის შემდეგ, ფეხბურთელი „რეალის“ ფეხბურთელის რანგში საბოლოო პრესკონფერენციას გამართავს და კარიერის ახალ ფურცელს გადაშლის.