გიორგი არაბიძეზე, ესპანეთთან შანსებზე და ქართველების ტრანსფერებზე - ვილი სანიოლის პრესკონფერენცია

მატჩის წინ კომენტარი საქართველოს ნაკრების მთავარმა მწვრთნელმა ვილი სანიოლმა გააკეთა.

ასეთი რთული ჯგუფიდან გასვლა უკვე დიდი წარმატებაა, ორგანიზების მხრინ შეჯიბრმა კარგად ჩაიარა. გულდასაწყვეტია, რომ ასეთი დონის ნაკრებებთან მოგების შემდეგ, ისრაელთან აგებ, თუმცა ახალგაზრდა ფეხბურთელებს თავიანთი შესაძლებლობების გამოვლენის შანსი მიეცათ და ზოგმა ეს გამოიყენა, მაგალითად საზონოვი იტალიის სერია ა-ში გადავიდა, კალანდაძე ეროვნული ნაკრების წევრი გახდა.

საინტერესო თამაში გველის. ესპანეთი ევროპის ერთ-ერთი უძლიერესი ნაკრებია და რთული მატჩი გველის. ჩემი მხრიდან ფეხბურთელებზე არანაირი ზეწოლა არ იქნება. ჩევნი მიზანია, ვითამაშოთ დისციპლინით, შევასრულოთ დავალება და დანარჩენი, მოედანზე გამოჩნდება.

მოხარული ვარ, რომ სატრანსფერო ფანაჯრა დაიხურა, რადგან ეს პროცესი დიდ სტრესთანაა დაკავშირებული. ბევრი კარგი ქართული ტრანსფერი გაკეთდა, რასაც პოზიტიურად უნდა შევხედოთ. 

გასაგებია, რომ კვარაცხელიამ ბოლო პენალტები ვერ გამოიყენა, მაგრამ შეცდომას ყველა უშვებს, მათ შორის მეც. თერთმეტმეტრიანებს მიქაუტაძეც კარგად ურტყამს, კიტეიშვილიც, ამიტომ ვნახავთ, ვინ იქნება იმ მომენტში მოედანზე და ვის ექნება უფრო კარგი შეგრძნება. ამ თემზე ბევრს არ ვფიქრობ, რადგან ჩემს ყველა ფეხბურთელს ვენდობი.

ყოველთვის ერთი და იგივე ტაქტიკით თამაში მიზანშეწონილი არ არის. მეტოქეებთან სიურპრიზების შეთავაზება და ყოველ მატჩში რამდენიმე ტაქტიკური ცვლილების გაკეთება უნდა შეგეძლოს.

არაბიძის პროგრესი აშკარაა, მან წინა თვეები ძალიან მაღალ დონეზე ჩაატარა და თვალს ვადევნებ, თუმცა ეს საკმარისი არ არის. თუ ის ასე გააგრძელებს და პროგრესს არ შეწყვეტს, საქართველოს ნაკრების კარი ღიაა.