საქართველო ევროპამდე რუმინეთმა არ მიუშვა » GOAL.GE - ფეხბურთი | fexburti

Goal.Ge

საქართველო ევროპამდე რუმინეთმა არ მიუშვა


საქართველო ევროპამდე რუმინეთმა არ მიუშვა

საქართველოს ფუტსალის ნაკრებმა ევროპის ჩემპიონატის ფინალურ ეტაპზე გასასვლელი პლეი ოფის მატჩი რუმინეთის ნაკრებთან დათმო და კონტინენტის ყველაზე პრესტიჟულ ტურნირზე ვერ მოხვდა.

პირველი მატჩი ქართველთათვის სასურველი შედეგით დასრულდა და ქართველებს რეალური შანსი გაუჩნდათ ევროპის ჩემპიონატის ფინალურ ეტაპზე მოსახვედრად.

წინა მატჩისგან განსხვავებით გუნდს დაუბრუნდნენ მეკარე ზვიად კუპატაძე და არჩილ სებისკვერაძე. ორივე სასტარტო ხუთეულში გამოჩდნენ.

თამაში ქართველებმა აქტიურად დაიწყეს, თუმცა რეალური ხიფათი არ შექმნილა. სამაგიეროდ, რუმინელებმა კონტრშეტევაზე დაგვიჭირეს და სავიომ ანგარიში გახსნა.

საქართველომ მოუმატა და მალევე კუთხური ჩინებულად გაითამაშეს, რასაც კაკაბაძის გასროლა და გოლი მოჰყვა. რამდენიმე წამში კუთხური ჩვენს კართან დაინიშნა, სებისკვერაძემ ჩაჭრა, საკუთარი საჯარიმოდან ირბინა და რუმინელთა მეკარეს აუღებელი დაურტყა _ 2:1.

კიდევ ერთი კუთხური და სებისკვერაძის დარტყმა რუმინელთა მეკარემ ვერ მოიგერია და ჩვენები კომფორტული უპირატესობით დაწინაურდნენ, მაგრამ ეს უპირატესობა შესვენებამდე ვერ შეინარჩუნეს.
ჯერ იყო და რუმინელებმა მარტივად გაიარეს ჩვენი დაცვა და ფერეირამ სხვაობა შეამცირა, ხოლო ზედ საფინალოს სასტვენის წინ, მეტოქეს დარტყმის საშუალება მივეცით და სტოიკამ ქუსლით ლამაზი გოლი სირენასთან ერთად გავიტანა _ 3:3.

უხვგოლიანი ფრე მეტოქეს აძლევდა ხელს და ეს უპირატესობა მეორე ტაიმის დასაწყისშივე გაიმდიდრეს, როდესაც სავიომ სტუმრები დააწინაურა. საქართველომ შეუტია და მიკოლოზ კურტანიძემ მშვენიერი დრიბლინგით ნახევარი გუნდი მოატყუა და ჩინებული გოლით ანგარიში გაათანაბრა _ 4:4.

13 წუთით ადრე მატჩის დამთავრებამდე, რუმინეთი კიდევ ერთხელ გავიდა წინ _ თავი ისევ სავიომ გამოიჩინა.

13 წუთი ფუტსალში დიდი დროა, თამაში ორმხრივ შეტევებში გაგრძელდა, გატანა ორივე გუნდს შეეძლო. სამწუხაროდ ჩვენები ბურთის გამოტანისას შეცდნენ და რადოკუმ სხვაობა ორბურთიანი გახადა.

ამან მდგომარეობა ძალიან დაამძიმა და ჩვენები ვა-ბანკზ წავიდნენ _ მეკარე მოთამაშით შეცვალეს, რათა შეტევაში რიცხოვრივი უპირატესობა ჰქონოდათ, მაგრამ მარტივი შეცდომის შემდეგ სავიომ ცარიელ კარში მეშვიდე გოლი შეგვიცურა.

4 გოლის გასატანი აღარც დრო იყო და აღაცრ ენერგია... სქაართველო ევროპის ჩემპიონატის მიღმა დარჩა...

საქართველო-რუმინეთი 4:7
(პირველი მატჩი 2:2)
0:1 სავიო (3.41), 1:1 კაკაბაძე (05.51), 2:1 სებისკვერაძე (06.33), 3:1 სებისკვერაძე (11.36), 3:2 ფერეირა (12.06), 3:3 სტოიკა (20.00) , 3:4 სავიო (21.07), 4:4 კურტანიძე (22.48), 4:5 სავიო (26.34), 4:6 რადოკუ (34.20), 4:7 სავიო (16.43)

საქართველო: კუპატაძე; ჭანუყვაძე, რონინიო, ფუმასა, სებისკვერაძე; ბუკია, კაკაბაძე, ლუკავა, თოფურია, კობაიძე, თოდუა, მაიასაია, კურტანიძე, ბობოხიძე

რუმინეთი: იანკუ; ფ.მატეი, ფერეირა, იგნატი, სავიო; ტონიჩა, მ.მატეი, რადოკუ, ლუპუ, ფელიპე, სტოიკა, შოცი, კოსმა, პანზარუ

ფეხბურთის ანგარიშები იხილეთ აქ - LIVESCORE

ყველა სიახლე

კვირის ტოპ 10

ცხრილები