ავტორიზაცია
ალისონ ბეკერი: ლივერპულმა მამარდაშვილის შესახებ მითხრა
ლივერპულის მეკარემ, ალისონ რამსეს ბეკერმა გიორგი მამარდაშვილზე ისაუბრა.
"ლივერპულმა მამარდაშვილის შესახებ მითხრა. ამაზე იქამდე ვიცოდი, სანამ პოტენციურ ტრანსფერზე ცნობები მედიაში გავრცელდებოდა, რაც კლუბის მხრიდან შესანიშნავი ქმედებაა, რადგან ეს ნიშნავს, რომ მათ აინტერესებთ, რას ვფიქრობ.
კლუბი თავისი მომავლისთვის უნდა მოემზადოს, რადგან ჩვენ აქ სამუდამოდ არ ვართ. თუმცა, მიუხედავად იმისა, რომ ასაკი მემატება, მაგრამ მეკარისთვის ასაკოვანი არ ვარ. ენერგია ჯერ კიდევ მაქვს და ლივერპულში დიდი ხნის გატარება შემიძლია. მსურს, გუნდისთვის მაქსიმუმი გავიღო," - განაცხადა ბრაზილიელმა.
ალისონმა კომენტარი საკუთარ მომავალსა და საუდი პრო ლიგიდან არსებულ ინტერესზეც გააკეთა:
"არაბები ჩემი ტრანსფერით ინტერესდებოდნენ, მაგრამ უარი ვთქვი, რადგან ლივერპულში მინიმუმ კონტრაქტის ამოწურვამდე დარჩენა მსურს. უარს არც ახალ ხელშეკრულებაზე ვიტყვი. მე და ჩემი ოჯახი აქ ბედნიერები ვართ.
საუდის არაბეთში ისეთ ხელფასს გთავაზობენ, რომ ცოტათი შენს ყურადღებას იქცევს, რაც ნორმალურია. ფეხბურთს სიყვარულისთვის თამაშობ, ამის კეთება მოგწონს, მაგრამ ეს ჩვენი პროფესიაცაა და გვსურს, მისგან მაქსიმუმი მივიღოთ. კარს არ ვხურავ, მაგრამ ამ ეტაპზე მხოლოდ ლივერპულზე ვარ ფოკუსირებული."
ბოლო პერიოდში გავრცელებული ცნობებით, ქართველი ფეხბურთელი ინგლისურ გრანდში გადასვლასთან ახლოსაა. მერსისაიდელები მას მიმდინარე სატრანსფერო ფანჯარაზე შეიძენენ და 1-წლიანი იჯარით ვალენსიაში დატოვებენ. ალისონის წასვლის შემდეგ, ის გუნდის პირველი მეკარე იქნება.
