ალისონის ტრავმიანობა - სიტუაცია, რომელიც ამტკიცებს, რომ მამარდაშვილის ტრანსფერი გამართლებულია

გასული ზაფხულის სატრანსფერო ფანჯარაზე ლივერპულმა ვალენსიადან გიორგი მამარდაშვილი £25 მილიონად შეიძინა. ამ ტრანსფერმა ბევრი მითქმა-მოთქმა გამოიწვია, რადგან მერსისაიდელებს ალისონ ბეკერი ჰყავთ და თითქოს ჩანდა, რომ კლუბს ახალი მეკარე არ სჭირდებოდა.

მიუხედავად ამისა, უკვე ცხადი ხდება, რომ ლივერპულის გადაწყვეტილება სწორია - ყველამ ვიცით, რომ ბრაზილიელი ტრავმებისკენ მიდრეკილია, ახლა კი მორიგი ტრავმა მიიღო და გუნდს კვლავ დააკლდება. ეს ნიშნავს, რომ მასზე მთელი სეზონის განმავლობაში დაყრდნობა სახიფათოა.

ქართველის ტრანსფერით კაოიმიჰინ კელეჰერიც უკმაყოფილო დარჩა და ეს საჯაროდ თქვა, მაგრამ ინგლისურმა კლუბმა ახალი მეკარის დამატებით სწორი ნაბიჯი გადადგა, მით უმეტეს, იმის ფონზე, რომ ლივერპული ირლანდიელს გრძელვადიან პერსპექტივაში ალისონის შემცვლელად არ განიხილავს.

მამარდაშვილი ევრო 2024-ზე შთამბეჭდავი იყო და საქართველოს მერვედფინალში გასვლაში დაეხმარა. ის 2021 წლიდან ვალენსიას წევრია და ლა ლიგაში შესანიშნავად ასპარეზობს. გიორგიმ 2022/23 წლების სეზონიდან მოყოლებული, მონაწილეობა თითქმის ყველა მატჩში მიიღო და ზედიზედ 69 შეხვედრა ჩაატარა - ალისონთან შედარებით, ეს ძალიან დიდი სხვაობაა.

ამ სეზონში ლივერპულმა პრემიერ ლიგაში მხოლოდ 7 მატჩი გამართა, მაგრამ ალისონი უკვე ორჯერ დაკარგა. კრისტალ პალასთან შეხვედრაში ბეკერმა ბარძაყი კვლავ დაიზიანა, რის გამოც ბორნმუთთან და ვესტ ჰემთან გასამართი მატჩებიც გამოტოვა.

კლუბისთვის კარგი ისაა, რომ ბრაზილიელმა ტრავმა სანაკრებო პაუზამდე მიიღო, მაგრამ არნე სლოტი მიმდევნო მატჩებში მის დაბრუნებას მაინც არ ელის. ალისონს რეაბილიტაციისთვის რამდენიმე კვირა დასჭირდება. უკვე არაერთი სეზონია, გუნდს ბეკერის ტრავმიანობა აწუხებს.

2024 წელს ალისონმა ბარძაყის არეში ტრავმა 3-ჯერ მიიღო, რის გამოც ლივერპულმა ზაფხულში მამარდაშვილი შეიძინა. ბეკერი კლუბის ისტორიაში ერთ-ერთ საუკეთესო მეკარედ მიიჩნევა, მაგრამ გიორგის ტრანსფერის მეშვეობით მომავლისთვის პრობლემის გადაჭრა აჩვენებს, რომ ხელმძღვანელობა კარგად მუშაობს.