ანალიზი | ზირკზეს პოტენციალი, რომელსაც მანჩესტერ იუნაიტედის უდიდესი პრობლემის გადაჭრა შეუძლია

პარასკევს, პრემიერ ლიგის პირველ ტურში მანჩესტერ იუნაიტედს ფულემთან უჭირდა, საბოლოოდ კი ახალწვეული ჯოშუა ზირკზეს მიერ მატჩის დასრულებამდე 2 წუთით ადრე გატანილი გოლით მოიგო.

ერიკ ტენ ჰაგის შეგირდებმა ბერნდ ლენოს კარი ვერაფრით აიღეს, რის შემდეგაც მოედანზე ზირკზე შევიდა და "წითელი ეშმაკების" რიგებში სადებიუტო მატჩში შეაგდო. ის უკვე ამტკიცებს, რომ შეუძლია, მანჩესტერის მთავარი პრობლემა, რასაც გოლების გატანა ჰქვია, გადაჭრას.

აღსანიშნავია, რომ ევროპის ჩემპიონატზე, ნიდერლანდების ნაკრებში, ჯოშუას ნაცვლად, ვუტ ვეგჰორსტი გამოიძახეს, რომელიც მანჩესტერში 5 თვის განმავლობაში თამაშობდა და გოლი არ გაუტანია - ამის ფონზე, იუნაიტედის ფანები ზირკზეს მიმართ ცოტათი პესიმისტურად იყვნენ განწყობილნი.

მიუხედავად ამისა, ნიდერლანდელმა კრიტიკოსები გააჩუმა: ზირკზეს პირველი პრემიერლიგური გოლის გასატანად მხოლოდ 26 წუთში დასჭირდა და ქომაგებს რუდ ვან ნისტელროი გაახსენა - ლეგენდარულმა ფეხბურთელმაც ასევე ოლ ტრაფორზე, ასევე ფულემთან, ასევე სადებიუტო მატჩში გაიტანა. საბოლოოდ, ვან ნისტელროიმ სადებიუტო სეზონში ინგლისის ჩემპიონატში 23 გოლი გაიტანა და ოქროს ბუცი მოიგო.

ზირკზე ვან ნისტელროისგან განსხვავებული თავდამსმხელია და, გოლების გატანაზე მეტად, თანაგუნდელების დახმარებაზეა ფოკუსირებული, თუმცა შემტევებს ხშირად სწორედ გოლების მიხედვით აფასებენ და ჯოშუასთვის ასეთი სტარტი მნიშვნელოვანი იყო.

როგორც ვახსენეთ, ვეგჰორსტს გოლები ვერ გაჰქონდა, რამაც მის მენტალურ მდგომარეობაზე იმოქმედა. ზირკზეს თანაგუნდელს, რასმუს ჰოილუნდს თავიდან ასევე უჭირდა და პრემიერ ლიგის რამდენიმე მატჩში არ გაუტანია.

ნორვეგიელი ფიქრობდა, რომ სადებიუტო შეხვედრაში გაიტანა, მაგრამ მის გოლამდე ბურთმა მოედნის ფარგლები დატოვა. მიუხედავად იმისა, რომ რასმუსმა ჩემპიონთა ლიგაზე მალევე შეაგდო, პრემიერლიგური გოლის გასატანად რამდენიმე თვე დასჭირდა. 

ტენ ჰაგმა თქვა, რომ ეს ფაქტი (გაუქმებული გოლი) ჰოილუნდისთვის ძალიან მძიმე იყო. მწვრთნელი ზირკზეს გამო ბედნიერი იყო და სჯერა, რომ ეს გოლი ნიდერლანდელს თავდაჯერებულობას მოუმატებს.

გოლების დეფიციტი

ჰოილუნდის ტრავმის ფონზე, ზირკზე ბრაიტონთან და ლივერპულთან გასამართ მატჩებში მანჩესტერ იუნაიტედის მთავარი ფორვარდი იქნება.

ბოლო 3 სეზონში "წითელ ეშმაკებს" 60 გოლზე მეტის გატანა გაუჭირდათ, გასულ სეზონში კი მხოლოდ 57 გაიტანეს. გუნდს ამ ასპექტში პროგრესი აუცილებლად მართებს, რაშიც ზირკზე უნდა დაეხმაროს.

მანჩესტერ იუნაიტედს აღნიშნული პრობლემა ლუი ვან გაალის ხელმძღვანელობის დროსაც ჰქონდა. 2015/16 წლების სეზონში ვან გაალის გუნდმა მხოლოდ 49 გოლი გაიტანა, რაც მე-17 ადგილზე გასულ კლუბზე ცოტათი მეტი იყო. შედარებისთვის, სერ ალექს ფერგიუსონის ბოლო სეზონში (2012/13) მანჩესტერმა მეტოქეთა კარი 86-ჯერ აიღო და პრემიერ ლიგა მოიგო.

ზირკზეს ნამდვილად აქვს პოტენციალი, რომ იუნაიტედს ამ პრობლემის მოგვარებაში დაეხმაროს.

ზირკზემ სერია A-ს გასულ სეზონში 11 გოლი გაიტანა - სწორედ იმდენი, რამდენიც ჰოილუნდმა მანჩესტერში გადასვლამდე. ამასთან, ნიდერლანდელმა 4 ასისტი მიითვალა.

ამ შედეგებით იუნაიტედის ფანები აღფრთოვანებულნი არ იქნებიან, მაგრამ ჯოშუა თავისი ტექნიკური შესასძლებლობებით, მოძრაობებითა და თანაგუნდელებთან შეთამაშებით გამოირჩევა. ზირკზე ცენტრფორვარდია, თუმცა ჰარი კეინის სტილის - ის ხშირად სიღრმეში იწევს და ფლეიმეიქერივით მოქმედებს.

ზირკზეს კუმირი ზლატან იბრაჰიმოვიჩი და გაბრიელ ბატისტუტა არიან. მისი ყოფილი მწვრთნელი, ტიაგო მოტა ნიდერლანდელს, თავისი უნიკალური უნარების გამო, რონალდინიოს ადარებდა. მოტამ აღნიშნა, რომ ჯოშუა მხოლოდ გოლებზე არაა კონცენტრირებული და მოედანზე დიდი გავლენა აქვს.

ზირკზე ამბობს, რომ ტიაგო მოტა სათამაშო სტილის ჩამოყალიებებაში ძალიან დაეხმარა, რის წყალობითაც მან ტრადიციული ცენტფროვარდისა და ფლეიმეიქერის უნარები აითვისა. ფეხბურთელს სჯერა, რომ ყველაზე მეტად ტექნიკა გამოარჩევს, რაც მაღალი შემტევისთვის უჩვეულოა. ის ფიქრობს, რომ კრეატიულობით გუნდის დახმარება ძლიერი კომბინაციაა.

ზირკზეს თანაგუნდელებისთვის საგოლე მომენტების შექმნა შეუძლია, რაც მანჩესტერ იუნაიტედისთვის მნიშვნელოვანი იქნება. გასულ სეზონში, ბრუნო ფერნანდეში და რასმუს ჰოილუნდი 10-10 გოლით გუნდის საუკეთესო ბომბარდირები იყვნენ, ალეხანდრო გარნაჩომ, მარკუს რაშფორდმა და სკოტ მაკტომინეიმ 7-7 გოლი გაიტანეს.

ტენ ჰაგის პირველ სეზონში, რაშფორდმა 17 გოლი შეაგდო, ფერნანდეშმა კი - 8. 2021/22 წლების სეზონში კრიშტიანუ რონალდუს ანგრიშზე 18 გოლი იყო, ბრუნომ კი მეტოქეთა კარი კვლავ 8-ჯერ აიღო.

მანჩესტერ იუნაიტედი იმედოვნებს, რომ ზირკზე - ჰოილუნდთან, რაშფორდთან და გარნაჩოსთან ერთად - გუნდის ერთ-ერთი საუკეთესო ბომბარიდრი იქნება.

ლეგენდარულმა ალან შირერმა ზირკზე შესანიშნავი პერფორმანსის გამო შეაქო და საჯარიმოში მისი მოქმედებები აღნიშნა.

მოსალოდნელია, რომ ზირკზე ჰოილუნდსაც დაეხმარება, რომ უკეთესი შედეგები აჩვენოს.