"ანანიძის ვიტესში ტრანსფერი? მათ მუდმივად რეალის მაგალითი მოყავდათ", - ქართველი აგენტი ჯანოს შესახებ
რუსულ ფეხბურთში მოღვაწე ცნობილმა აგენტმა, თემურ ლეპსაიამ განაცხადა, რომ ბათუმის "დინამოს" შემტევ ნახევარმცველს, ჯანო ანანიძეს თავის დროზე არნემის "ვიტესში" გადასვლა შეეძლო.
"ანანიძეს ვიტესში ტრანსფერი ნამდვილად სურდა. ის იმ ფაქტმაც არ დააბრკოლა, რომ ხელფასი დაახლოებით 60 პროცენტით შეუმცირდებოდა. მაშინ ამ გუნდს სლუცკი წვრთნიდა.
მას ჯანოსთან მუშაობა სურდა, ტრანსფერის წინააღმდეგი არც სპარტაკი იყო, თუმცა შეთანხმება არნემული კლუბის იურისტებმა ჩაშალეს. კლუბმა მოსკოველებს საიჯარო პერიოდში მისთვის გადასახდელი მთლიანი თანხის ჩარიცხვა მოსთხოვა.
ამის გარდა, რუსულ კლუბს უნდა გადაეხადა უზარმაზარი ნიდერლანდური გადასახადი, რაც 52 პროცენტს შეადგენს. ამ ტიპის კონტრაქტი კლუბისთვის მიუღებელი და წამგებიანი იყო.
ადვოკატებმა თქვეს, რომ ასე არ შეიძლებოდა, მათ რეალის მაგალითი მუდმივად მოჰყავდათ, როცა ოდეგორი იჯარით ''არწივებში'' გადავიდა. ამასთან დაკავშირებით მათ თქვეს:
რეალმა მთელი ფული მშვიდად გადმოგვცა, სპარტაკმაც იგივე გააკეთოს. ესპანეთში საშემოსავლო 45 პროცენტი გახლავთ, რუსეთში კი - 13%. ასე რომ მადრიდელებისთვის, მოსკოველებისგან განსხვავებით, მნიშვნელობა არ ჰქონდა საშემოსავლოს პროცენტს.
ფიქრობენ, რომ ქართველი შემტევი ნახევარმცველი 45 წლისაა, თუმცა ეს ასე არაა, უბრალოდ, ფეხბურთს დიდი ხანია თამაშობს. ოქტომბერში სულ რაღაც 30-ის გახდება.
თუ ტრავმები არ ექნება, მას კვლავ შეუძლია რუსეთის ჩემპიონატში დაბრუნება. ვიცი, რომ სპარტაკის ყოფილი გამთამაშებლისთვის ფული პირველ ადგილზე არ არის.
მან ფული კარგად გამოიმუშავა და ახლა სურს ფეხბურთისგან სიამოვნების მიღება", - განაცხადა წარმოშობით ქართველმა აგენტმა 29-წლის ფლეიმეიქერის შესახებ.
