ანჩელოტიმ რეალში გამოასწორა ის, რასაც ზიდანი არანაირ ყურადღებას არ აქცევდა - იტალიელის წარმატების საიდუმლო
El Chiringuito TV-ს ჟურნალისტი, ედუ აგირე, „რეალის“ გასახდელში არსებულ სიტუაციაზე წერს.
„ანჩელოტიმ გასულ სეზონთან შედარებით გუნდზე წამოსული ზეწოლის შემცირება შეძლო. მან იცის, რომ შემადგენლობაში არაერთი ისეთი ფეხბურთელი ჰყავს, ვისაც ყველაფერი მოგებული აქვს და იტალიელმა გაიაზრა, რომ მათთვის გამარჯვების წყურვილის დაბრუნებაა აუცილებელი.
გარდა ამისა, კარლო „რეალში“ დაბრუნდა იმ აზრით, რომ ფსონს სამ ფეხბურთელზე გააკეთებდა: ვინისიუსზე, ასენსიოზე და როდრიგოზე. მწვრთნელს სურდა, რომ მათ უფრო მნიშვნელოვანი როლი შეესრულებინათ, ვიდრე ეს ზიდანის დროს იყო. სწორედ ამ სამეულს დაუთმო ყველაზე დიდი დრო ანჩელოტიმ წინასასეზონო მომზადების დროს.
გარდა ამისა, „მადრიდის“ მწვრთნელმა თავისი სამწვრთნელო შტაბის წინაშე მოთხოვნა წამოაყენა: გუნდში მიკროკლიმატი უნდა გაუმჯობესებულიყო. ის ფიქრობს, რომ ფეხბურთელები ერთ დიდ ოჯახს უნდა წარმოადგენდნენ. კლუბში დაბრუნების შემდეგ, ანჩელოტი მუდმივად ინარჩუნებს კონტაქტს თავის შეგირდებთან.
არ მინდა არანაირი შედარებების გაკეთება, მაგრამ ზიდანი ფეხბურთელებიდან პრაქტიკულად არავის არ ეკონტაქტებოდა, იტალიელი კი პირიქით, თავის შეგირდებთან მუდმივ კონტაქტზეა.
გუნდში მიკროკლიმატის გაუმჯობესების საკითხი ანჩელოტიმ თავის შვილს დავიდეს მიანდო, რომელიც მისივე ასისტენტია. ასევე, ეს ამ სფეროში დიდ როლს ასრულებს ლოპისიც (მეკარეების მწვრთნელი).
ანჩელოტი ხშირად უსვამს ხაზს ურთიერთობის მნიშვნელობას, განსაკუთრებით იმ ფეხბურთელებთან, რომლებსაც ნაკლები სათამაშო დრო ეძლევათ. მაგალითად შეიძლება მარსელოს შემთხვევის მოყვანა: როცა ის ტრავმიდან ახალი დაბრუნებული იყო, ბრაზილიელი დიდი ხნის მანძილზე ხურდებოდა, თუმცა მწვრთნელმა ის მოედანზე საერთოდ არ შეუშვა. მატჩის შემდეგ, იტალიელმა მარსელოს მთელი გუნდის წინაშე მოუბოდიშა.
სიტუაციის განსამუხტად ანჩელოტი მზადაა ბოდიში მოიხადოს, როგორც ეს სებალოსის შემთხვევაში გააკეთა, რომელიც ძალიან გაბრაზდა მწვრნელზე, რომელმაც „ალკოიანოსთან“ მატჩში ის მოედანზე მხოლოდ 86-ე წუთზე შეიყვანა.
იტალიელმა იცის, რომ წარმატების საიდუმლო მოდის მაშინ, როცა ვეტერანები როტაციის ახალგაზრდა ფეხბურთელებზე იწყებენ ზრუნვას. ეს კლუბში იდეალური ეკოსისტემის შექმნას ეხმარება. ანჩელოტიმ „მადრიდში“ ტაქტიკურადაც კარგი სამუშაო ჩაატარა, მაგრამ სწორედ პერსონალთან იდეალური ურთიერთობით იქმნება „რეალის“ ამჟამინდელი წარმატებები.
