"არ შეცდებით, თუ არჩევანს მასზე შეაჩერებთ", - ფერდინანდმა მანჩესტერს რონალდუს შემცვლელი ურჩია
"მანჩესტერ იუნაიტედის" ყოფილი მცველი, რიო ფერდინანდი მიიჩნევს, რომ მანიკუნიანელებმა კლუბის ყოფილ თავდამსხმელ დენი უელბეკზე უნდა გაამახვილონ ყურადღება, რომელიც ამჟამად "ბრაიტონში" ირიცხება.
ფერდინანდი პრემიერ ლიგის პირველ ტურში ზემოთნახსენებ კლუბებს შორის გამართულ შეხვედრაში 31 წლის ინგლისელის თამაშით მოიხიბლა.
"უელბეკი მოედანზე გამოვიდა, თქვენ კი დაინახავდით, როგორ აიჩეჩა მხრები მკერდაწეულმა და ფიქრობდა: "მარტინესს და მაგუაირს დავატერორებ". "ემიუს" წინააღმდეგ მის მიერ ნაჩვენები თამაში 10 წლის წინ "სანტიაგო ბერნაბეუზე" მადრიდის "რეალთან" მის პერფორმანსს ჰგავდა".
"თუ სათადარიგო თავდამსხმელი გჭირდებათ, არ შეცდებით, თუ უელბეკზე შეაჩერებთ არჩევანს. უბრალოდ უთხარით: "სეზონში 15-20 მატჩს ჩაატარებ, კრიშტიანუ რონალდუს შეცვლი", - თქვა ფერდინანდმა.
მოგეხსენებათ, უელბეკი "მანჩესტერ იუნაიტედის" აღზრდილია. კლუბის სტრუქტურაში იგი 2001 წლიდან 2014 წლამდე ირიცხებოდა.
