არეულობა კოპა ამერიკის გარშემო - ბრაზილიასთან მატჩამდე რამდენიმე საათით ადრე, გუნდის 12 წარმომადგენელს კოვიდ19 დაუდასტურდა

კოპა ამერიკას დაწყებამდე სულ ცოტა დრო რჩება, თუმცა ჯერაც კი გაურკვეველია, რა ბედი ეწევა ტურნირს.

თავდაპირველად, კონტინენტის პირველობა კოლუმბიასა და არგენტინაში უნდა ჩატარებულიყო, თუმცა ამ ქვეყანაში დაწესებული ანტივირუსული რეგულაციების გამო, ეს შეუძლებელი აღმოჩნდა და ტურნირი ბრაზილიაში გადაიტანეს. თავის მხრივ, ბრაზილიაშიც არ არის სახარბიელო მდგომარეობა, რის გამოც ფეხბურთელები თამაშზე უარს ამბობდნენ, თუმცა საბოლოოდ მათი დაყოლიება მოხერხდა.

იმ დროს, როცა თითქოს, ტურნირის დაწყებას ხელი აღარაფერს უნდა შეეშალა, ახალი ცუდი ამბავი მოხდა - როგოც ვენესუელას ეროვნული ნაკრების წარმომადგენლები აცხადებენ, მათ გუნდში 12 ადამიანს, რომელთა შორის არიან ფეხბურთელები და თანამშრომლები, კოვიდ19 დაუდასტურდათ.

პრობლემას კი ის წარმოადგენს, რომ ვენესუელას კოპა ამერიკას გახსნაში უნდა მიეღო მონაწილეობა - ამაღამ, თბილისის დროით 01:00 საათზე, გუნდი ბრაზილიის ნაკრებს უნდა დაუპირისპირდეს.

ჯერჯერობით უცნობია, როგორ განვითარდება მოვლენები და საერთოდ, ჩატარდება თუ არა ჯერ ეს მატჩი, შემდეგ კი ტურნირი მთლიანობაში.