არტურო ვიდალს გაუპატიურებაში ადანაშაულებენ

Marca-ს ინფორმაციით, არტურო ვიდალსა და კოლო კოლოს რამდენიმე ფეხბურთელს ჩილეში, ერთ-ერთ ღამის კლუბში ქალისთვის სასმელში ნარკოტიკის ჩაყრასა და მასზე სექსუალურ ძალადობაში ადანაშაულებენ.

ჯერჯერობით, არავინ დაუკავებიათ. დანაშაულში ჩართულთა სახელებიც უცნობია, მაგრამ ის ვიცით, რომ პოლიციის განყოფილებაში მხოლოდ ვიდალი წაიყვანეს.

გავრცელებული ცნობებით, შემთხვევა ორშაბათს, 4 ნოემბერს, დილის საათებში მოხდა. კოლო კოლო მატჩის მოგებასა და 2 ფეხბურთელის დაბადების დღეს აღნიშნავდა.

ვიდალი კოლო კოლოში მიმდინარე წლის დასაწყისში, 17-წლიანი პაუზის შემდეგ დაბრუნდა. ევროპაში მან ლევერკუზენში, იუვენტუსში, ბაიერნში, ბარსელონასა და ინტერში ითამაშა.