ავტორიზაცია
ბარსელონა 4-1 ბაიერნი | ჰანსი ფლიკი მატჩის შემდეგ
ბარსელონას მთავარმა მწვრთნელმა, ჰანსი ფლიკმა, ბაიერნის დამარცხების (4-1) შემდეგ, მედიასთან ისაუბრა.
"ეს დაუჯერებელია. ბაიერნი დიდი გუნდია... როცა ასეთ მატჩებს იგებ, უნდა აღნიშნო. ელ კლასიკომდე, ეს მოგება დიდ თავდაჯერებულობას გვაძლევს.
ერთმანეთს ორი განსხვავებული ფილოსოფიის კლუბი ხვდებოდა. მატჩი დიდებული იყო. მას შემდეგ, რაც პირველი გოლი გავიტანეთ, 10-15 წუთის განმავლობაში გაგვიჭირდა. საბოლოოდ, გუნდმა საკუთარ თავში ძალა იპოვა, რაც მახარებს. ახალგაზრდული გუნდი გვყავს, რომელსაც დიდებული პოტენციალი აქვს. ვცდილობთ, ყოველ შეხვედრაში განვვითარდეთ.
ძალიან ბედნიერი ვარ. ამ ფეხბურთელების დონეს ყველა ხედავს. მეორე ტაიმში ყველაფერი ნათლად გამოჩნდა, როცა ბურთის ფლობა შევინარჩუნეთ.
ჩემი გუნდის დაცვამ ძლიერი მეტოქის წინააღმდეგ სოლიდურად იმოქმედა.
დღეს ხალისიანად და გაბედულად ვითამაშეთ. ყველა მონდომებულია და სწავლობს. გუნდი იმას იმსახურებს, რასაც დღეს მიაღწია.
კასადო ბრწყინვალე ფეხბურთელია. მისი ისტორია შთამბეჭდავია. დიდებული დაცვაში და ბურთით... ლა მასიის პროდუქტი...
პედრი უმაღლესი დონის ფეხბურთელია, მატჩების მოგების ამბიცია აქვს და ყველაფერს მარტივად აკეთებს. მისი ყურება ნამდვილი სიამოვნებაა.
ფეხბურთელებს ყოველთვის ვეუბნები, მათგან რას ველი, რისი გაუმჯობესება შეუძლიათ და რა პლუსები აქვთ. მოთამაშეებთან მუდამ გულწრფელი ვარ, რადგან მნიშვნელოვანია, მათ სიმართლე გაიგონ, მიუხედავად იმისა, რომ შესაძლოა, ზოგჯერ ეს არ მოსწონდეთ.
ოლმო, დე იონგი, ფერმინი და გავი დაგვიბრუნდნენ. მათ აჩვენეს, რომ მზად არიან, დაგვეხმარონ. ისინი სრულად გამოჯანმრთელებულნი ჯერ კიდევ არ არიან. როცა ყველა მათგანი მზადყოფნაში იქნება, შემადგენლობის შერჩევის დროს მეტი არჩევანი მექნება.
რეალ მადრიდთან მატჩზე ჯერ არ ვფიქრობ. ამას ხვალიდან დავიწყებ. ელ კლასიკოსთვის მოსამზადებლად, მეტოქეზე 1 დღით ნაკლები გვაქვს, მაგრამ მჯერა, რომ ძალებს აღვიდგენთ.
ჯერ ძალიან ადრეა იმის განსაზღვრა, ვართ თუ არა ჩემპიონთა ლიგის მოგების კანდიდატები. სეზონი მხოლოდ და მხოლოდ ახლა დაიწყო. პროგრესი უნდა განვაგრძოთ.
რაფინია კარგი მაგალითია იმისა, თუ როგორ მუშაობს გუნდი. ის სავარჯიშო სესიებსა და მატჩებში მაქსიმალურად იხარჯება. ბრაზილიელი ძალიან ინტენსიურია... მას გოლები გააქვს და ბურთიანად შესანიშნავია. რაფინიას მსგავსი მოთამაშე არასდროს მყოლია. ის საქმეში მთელ გულს დებს და ყოველთვის იცინის.
ფეხბურთის თამაში გვიხარია. ბევრჯერ ვთქვი, ლა მასიის მიმართ როგორი დამოკიდებულება მაქვს, მაგრამ ამის სიტყვებით აღწერა რთულია.
ლა მასიელთა ყურება დიდებულია. განსაკუთრებული გუნდი ვართ, რაზეც აკადემიას უდიდესი გავლენა აქვს - ეს ფაქტორი ფეხბურთელთა ურთიერთობაზე ძალიან მოქმედებს.
ბარსელონაში ყოფნით ძალიან ბედნიერი ვარ.
ბარსელონა დიდებული კლუბია. ფეხბურთელებისგან, შტაბისგან და გუნდში მომუშავე თითოეული ადამიანისგან ვნება იგრძნობა. როცა ქუჩაში გადიხარ, ხალხი გეგებება. ეს შესანიშნავია და ვიცი, რომ დიდი პასუხისმგებლობა მაკისრია," - განაცხადა გერმანელმა.
დღეს ბაიერნის კარი რაფინიამ (3-ჯერ) და რობერტ ლევანდოვსკიმ აიღეს, "რეკორდმაისტერის" მხრიდან კი ერთადერთი გოლი ჰარი კეინმა გაიტანა.
