ბარსელონა ნიკო უილიამსის აგენტს შეხვდა

Jijantes-ის ინფორმაციით, დღეს ბარსელონას სპორტული დირექტორი დეკუ სარაგოსაში ნიკო უილიამსის აგენტს შეხვდა.

კატალონიურმა გრანდმა 22 წლის ფეხბურთელს შეთავაზება გაუკეთა და ცდილობს, მასთან პირადი კონტრაქტის დეტალები შეათანხმოს, სანამ ინგლისური კლუბები კიდევ უფრო გააქტიურდებიან. პრეზიდენტმა ჟოან ლაპორტამ დეკუს სთხოვა, ეს საკითხი მალე მოაგვაროს.

ფაბრიციო რომანოს ცნობით, ბარსელონა ამჟამად მხოლოდ უილიამსის ტრანსფერზე ფიქრობს. ამ კვირაში მის აგენტთან მოლაპარაკებები ძალიან ინტენსიური იქნება. ჯერჯერობით, უცნობია, ფეხბურთელი ბარსაში გადასასვლელად ხელფასს შეიმცირებს თუ არა, მაგრამ "ბლაუგრანას" ანაზღაურების სხვაგვარი სტრუქტურის შემუშავება შეუძლია: მაგალითად, კონტრაქტში ბონუსების ჩამატება მოგებული ტიტულების ან ნიკოს მიერ ჩატარებული მატჩების მიხედვით.

ბარსელონა ოპტიმისტურადაა განწყობილი, მაგრამ ტრანსფერის სწრაფად განხორციელება სურს, რადგან ჩელსისა და არსენალისგან პოტენციური კონკურენცია თავიდან აირიდოს. ჰანსი ფლიკი ნიკოს მოყვანაზე თანახმაა და თავად ფეხბურთელიც უპირატესობას ბარსას ანიჭებს. 

უილიამსთან პირადი კონტრაქტის შეთანხმებისთანავე, ბარსას ხელმძღვანელობა ლა ლიგას თანხმობას სთხოვს და შემდეგ ბილბაოს ატლეტიკს ფეხბურთელის გამოსასყიდ თანხას (€55 მილიონი) გადაუხდის.