ბარსელონამ გიუნდოგანი გაუშვა - ფაქტი, რომელიც მეტყველებს, რომ ლაპორტას სტრატეგიები არ მუშაობს

ჟოან ლაპორტას დაპირებების მიუხედავად, ბარსელონას ფინანსური პრობლემები გრძელდება. ჟოზეპ მარია ბართომეუს გადადგომიდან 4 წლის შემდეგაც კი კლუბი კრიზისულ სიტუაციაშია. 

მიმდინარე წლის დასაწყისში ლაპორტამ თქვა, რომ ბარსელონას ეკონომიკური მდგომარეობა გამოსწორების გზაზე იყო და მალე ტრანსფერების განხორციელებას თავისუფლად შეძლებდა, მაგრამ ბარსა ახალწვეულ დანი ოლმოსაც კი ჯერ კიდევ ვერ არეგისტრირებს. ამის გამო კლუბს ფეხბურთელების გაყიდვა ან ხელფასების შემცირება უწევს.

ილქაი გიუნდოგანი, რომელიც გასულ სეზონში ბარსელონას ერთ-ერთი საუკეთესო ფეხბურთელი იყო, სწორედ ამას შეეწირა. გერმანელს ბარსაში დარჩენა სურდა და კლუბთან კონტრაქტი 2026 წლამდე აკავშირებდა, თუმცა "ბლაუგრანამ" მას წასვლა სთხოვა. ილქაი ამას დათანხმდა, რადგან არ უნდოდა, ბარსელონასთვის პრობლემა გამხდარიყო.

გიუნდოგანი "ლურჯ-ბროწეულისფერებს" გასულ წელს შეუერთდა და ახალი გამოწვევით ბედნიერი იყო, მაგრამ კლუბის მდგომარეობითა და ამბიციების ნაკლებობით უკმაყოფილო დარჩა. ის თანაგუნდელებსა და გუნდის პერფორმანსებს აკრიტიკებდა. საბოლოოდ, ილქაი გუნდიდან გაუშვეს და მანჩესტერ სიტიში ბრუნდება.

გარკვეული პროგრესის მიუხედავად, ფაქტია, რომ ლაპორტას მიერ მიღებული ზომები - სახელფასო ფონდის შემცირება, კლუბის აქტივების გაყიდვა და ა.შ. - ბოლომდე ვერ ამართლებს, რადგან ფინანსური პრობლემები კვლავ არ მოგვარებულა.

ბარსელონას UEFA-სგან სერიოზული სანქციები ემუქრება. ამასთან, ვცრელდება ცნობები, რომ 2022/23 წლების სეზონში კლუბის ფინანსური დანაკარგი, შესაძლოა, ევროპული ფეხბურთის ისტორიაში ერთ-ერთი უდიდესი იყოს.

მოკლე მონაკვეთში ბარსამ გარკვეულ წარმატებებს მიაღწია და ლა ლიგის ჩემპიონი გახდა, მაგრამ გრძელვადიან პერსპექტივაში მისი მომავალი ბუნდოვანია.