ბარსელონამ ნიკო უილიამსის ტრანსფერზე მუშაობა დაიწყო!

Sport-ის ინფორმაციით, ბარსელონამ ნიკო უილიამსის ტრანსფერზე მუშაობა დაიწყო - კატალონიური კლუბი ფინანსური საკითხების მოსაგვარებლად საჭირო პროცედურებს წარმატებით აწარმოებს და ლა ლიგასთან მუდმივ კონტაქტზეა.

ამასთან, დეკუ (ბარსას სპორტული დირექტორი) და ესპანელი ფეხბურთელის აგენტი პერმანენტულ კომუნიკაციას ინარჩუნებენ. ნიკოთი პრემიერლიგური კლუბებიც ინტერესდებიან, მაგრამ მისი პრიორიტეტი "ბლაუგრანაა". ბოლო დღეებში კატალონიურ გრანდში ოპტიმიზმმა მოიმატა.

წლის უდიდესი ნაწილის განმავლობაში ბარსელონა პრიორიტეტს საყრდენი ნახევარმცველის შეძენას ანიჭებდა, მაგრამ ახლა სიტუაცია შეიცვალა - მთავარი სამიზნე ნიკო უილიამსია. ბილბაოს ფეხბურთელი ბრწყინვალე ფორმაშია და ბარსაში სჯერათ, რომ მისი ტრანსფერი კლუბზე ბევრად დიდ გავლენას მოახდენს. "ლურჯ-ბროწეულისფერები" ფიქრობენ, რომ ნიკოსა და დაბალფასიანი შუახაზელის შეძენა კარგი გეგმაა. ბარსელონა აცნობიერებს, რომ ფლანგებზე უილიამსის, ლამინ იამალისა და რაფინიას ყოლა დონეს აწევს და შიდა კონკურენციას გაზრდის.

აღსანიშნავია, რომ ნიკოს შესაძლო ტრანსფერი ანსუ ფატის გუნდში ადგილის დაბრუნების შანსს პრაქტიკულად არ უტოვებს, მიუხედავად იმისა, რომ მას პრესეზონის ბარსაში გატარება და ჰანსი ფლიკის ნდობის მოპოვება სურს.