ბარსელონას 10 ფეხბურთელი, რომელიც, სავარაუდოდ, ამერიკულ ტურნეს გამოტოვებს

ბარსელონა წინასასეზონო მზადების ფარგლებში ამერიკას ეწვევა, მაგრამ კლუბის ახალ თავკაცს, ჰანსი ფლიკს ამერიკულ ტურნეზე დანაკლისი ექნება.

ბარსას 5 ფეხბურთელი ევროპის ჩემპიონატის ნახევარფინალშია. 1/2-ფინალში ერთმანეთს ესპანეთი და საფრანგეთი დაუპირისპირდებიან - ამ ნაკრებებში კატალონიელთა 5 წევრი ირიცხება: ლამინ იამალი, პედრი (მას ტრავმაც აქვს), ფერან ტორესი, ფერმინ ლოპესი და ჟიულ კუნდე. ევროზე მყოფ მოთამაშეებს კლუბი 3-კვირიან შვებულებას მისცემს, რაც ნიშნავს, რომ ისინი გუნდს აგვისტომდე ვერ შეუერთდებიან და პრესეზონის მატჩებისთვის მზად არ იქნებიან.

სანაკრებო ტურნირზე იყო რაფინიაც, მაგრამ ის კოპა ამერიკის მეოთხედფინალიდან გამოვარდა და საკითხავია, აშშ-ში რამდენად გაემგზავრება.

ამასთან, კოპა ამერიკაზე, ბრაზილიასთან შეხვედრაში, რონალდ არაუხომ ტრავმა მიიღო (გარდა იმისა, რომ ურუგვაი 1/2-ფინალშია და დასვენებაც ეკუთვნოდა). სავარაუდოდ, ის პრესეზონისთვის გამოჯანმრთელებას ვერ მოასწრებს. მის მსგავსად, ტრავმირებულია ფრენკი დე იონგიც.

ფლიკი პაუ კუბარსისა და ერიკ გარსიას გარეშეც იქნება, რადგან ესპანეთის ოლიმპიურ ნაკრებში არიან გამოძახებულნი. ფინალი 9 აგვისტოსაა და თუ "ფურია როხა" იქამდე მიაღწევს, ისინი ლა ლიგის მომდევნო სეზონის სტარტსაც კი გამოტოვებენ.

ბარსელონა პრესეზონის პირველ მატჩს 30 ივლისს, მანჩესტერ სიტის წინააღმდეგ გამართავს. მეორე მატჩში, 3 აგვისტოს ფლიკის შეგირდები რეალ მადრიდს დაუპირისპირდებიან, 6 აგვისტოს კი - მილანს.