ბარსელონას ესპანეთის ნაკრების მცველი სურს და ტრანსფერში შეიძლება ერთ-ერთი ფეხბურთელიც ჩართოს
"ბარსელონას" ხელმძღვანელობას "ვილიარეალისა" და ესპანეთის ეროვნული ნაკრების მცველ პაუ ტორესის ხელში ჩაგდება სურს.
როგორც El Chiringuito TV იტყობინება, კატალონიური გრანდი 25 წლის ფეხბურთელით სერიოზულადაა დაინტერესებული. თავად პაუ მზადაა "ბლაუგრანას" შეუერთდეს, "ყვითელი წყალქვეშა ნავი" კი მისი გაშვების წინააღმდეგია.
ესპანელი ჟურნალისტი, ხოსე ალვარეს გაია იუწყება, რომ "ბლაუგრანამ" ტორესის თაობაზე "ვილიარეალს" უკვე მიმართა, რომელსაც ფული სჭირდება - გარდა ამისა, ტრანსფერში შესაძლოა "ლურჯ-ბროწეულისფერთა" რომელიმე ფეხბურთელიც ჩართონ. მაგალითად, აბდე ეზალზული.
პაუს პოტენციური ტრანსფერი 40-50 მილიონ ევროდ ფასდება. ფეხბურთელი კატალონიურ გრანდში გადასვლის შესაძლებლობით გახარებულია, "ბარსას" კი იგი ძალიან ესიმპათიურება.
გასულ სეზონში "ვილიარეალის" დაცვის ხაზის ლიდერმა ყველა ტურნირზე ერთად 46 მატჩი ჩაატარა და 6 გოლი გაიტანა.
