ბარსელონას სეზონის პრევიუ: შეძლებს ჰანსი ფლიკი სიტუაციის გამოსწორებას შობამდე?

ბარსელონას ახალი მწვრთნელი ჰყავს, მაგრამ, ფინანსური პრობლემების ფონზე, გაურკვეველია, გუნდი რამდენად კონკურენტუნარიანი იქნება. კლუბი ამჟამად ბევრ დაბრკოლებას ებრძვის.

კატალონიური გრანდი ამაყი ინსტიტუცია იყო, მაგრამ ახლა მეტი დრამითა და ნაკლები წარმატებით "გამოირჩევა". გასულ სეზონში გუნდში სრული არეულობა სუფევდა. თავდაპირველად, იანვარში ჩავი ერნანდესმა თქვა, რომ სეზონის ბოლოს ბარსას დატოვებდა, აპრილში აზრი შეიცვალა, შემდეგ კი პრეზიდენტმა ჟოან ლაპორტამ მაინც გაუშვა.

ამ ქაოსის გამო ბარსელონამ ტიტული ვერ მოიგო, მათმა კონკურენტმა რეალმა კი ლა ლიგა და ჩემპიონთა ლიგა დაისაკუთრა. ჩავის წასვლის შემდეგ გუნდში ჰანსი ფლიკი მივიდა. გერმანელს წინ დიდი გამოწვევები ელის.

ფანების ნაწილი ღელავს, რადგან ლაპორტამ სპონსორების მოზიდვით კლუბის ფინანსური მდგომარეობა ვერ მოაგვარა. ზოგი ექსპერტი ფიქრობს, რომ ის ბარსას წინა პრეზიდენტს, ჟოზეპ მარია ბართომეუს დიდად ვერ სჯობს, რომელმაც კლუბს ვალები დაუტოვა და კინაღამ გააკოტრა.

ლა ლიგის პირველ ტურში ვალენსიას წინააღმდეგ გასამართ მატჩამდე ბარსელონა ახალწვეულებს - დანი ოლმოსა დ პაუ ვიქტორსაც ვერ არეგისტრირებს, რაც კარგის ნიშანი არაა. ფინანსური პრობლემების გადასაჭრელად ლაპორტას სატრანსფერო ფანჯრის დახურვამდე ფეხბურთელების გაყიდვა სჭირდება.

ნიკო უილიამსის ტრანსფერის ჩაშლის შემდეგ, ბარსელონას ქომაგები დანი ოლმოს შეძენით ბედნიერნი არიან. ოლმო ესპანეთის ნაკრებს ევროპის ჩემპიონობაში დაეხმარა, და ბარსას ერთ-ერთი მთავარი სამიზნე იყო. მიუხედავად ამისა, მისმა სატრანსფერო ღირებულებამ ბევრი გააკვირვა და ფიქრობს, რომ არასტაბილურ ფეხბურთელში €55 მილიონი ზედმეტად ძვირია. თუმცა, ისიც უნდა აღინიშნოს, რომ დანი უნივერსალია და შეტევაში ყველა პოზიციაზე თამაში შეუძლია.

პაუ ვიქტორის შესანიშნავი ფორმის გათვალისწინებით, ბარსელონა, სავარაუდოდ, რომელიმე შემტევს გაყიდის, თუმცა, ჯერჯერობით, სპორტულ დირექტორ დეკუს მოთამაშეების გასხვისება უჭირს. ამ დროისთვის, კლუბმა გაყიდვებით €16 მილიონი იშოვა - გუნდი მარკ გიუმ (ჩელსიში) და ხულიან არაუხომ (ბორნმუთში) დატოვეს. ასევე, გუნდიდან თავისუფალი აგენტის სტატუსით სერჟინიო დესტი, მარკოს ალონსო და სერჟი რობერტო წავიდნენ, რამაც სახელფასო ფონდი შეამცირა. ახლა ხელმძღვანელობა კლემან ლანგლეს გაყიდვაზე მუშაობს.

ზოგიერთი გულშემატკივარი კვლავ იმედოვნებს, რომ ნიკო უილიამსის ტრანსფერი შედგება, მაგრამ, დიდი ალბათობით, ეს არ მოხდება. კლუბი, ჯერჯერობით, ამჟამინდელ შენაძენებსაც ვერ არეგისტრირებს.

გავრცელებული ინფორმაციით, ბარსელონა ფრენკი დე იონგის გაყიდვასაც განიხილავს. კატალონიელები მსურველებს ანსუ ფატისა და ვიტორ როკესთვისაც ეძებენ - ისინი გუნდის გეგმებში აღარ შედიან.

ბარსელონამ წინასასეზონო მზადება ადგილობრივ ოლოტთან მატჩით დაიწყო, რომელიც პაბლო ტორეს გოლით მოიგო და ამერიკის შეერთებულ შტატებში კარგ ხასიათზე გაემგზავრა.

მანჩესტერ სიტისთან შეხვედრაში ტორემ და პაუ ვიქტორმა გაიტანეს, მატჩი 2-2 დასრულდა და ბარსამ პენალტების სერიაში 4-1 იმარჯვა. პაუ ვიქტორმა თავი რეალთანაც გამოიჩინა და დუბლი შეასრულა, ბარსელონამ კი მეტოქე 2-1 დაამარცხა. მესამე მატჩში, რომელიც მილანთან 2-2 დასრულდა, რობერტ ლევანდოვსკიმ 2 გოლი შეაგდო, თუმცა გუნდი თერთმეტმეტრიანებში დამარცხდა.

პოზიტიური შედეგების მიუხედავად, ბარსელონამ გამპერის თასზე, მოულოდნელად, 0-3 წააგო. ბარსას ამ თასზე 2012 წლის შემდეგ არ წაუგია. აღნიშნული მატჩის შემდეგ მოლოდინები კვლავ შემცირდა.

ბარსელონა, როგორც წესი, 4-3-3 სქემით თამაშობს, მაგრამ ჰანსი ფლიკის ფავორიტი ფორმაცია 4-2-3-1-ია. პრესეზონზე დაყრდნობით თუ ვიმსჯელებთ, გერმანელი ბარსაშიც ამ სქემას გამოიყენებს.

გუნდში გასულ სეზონში ხშირი ტრავმიანობა შეინიშნებოდა და გადამწყვეტ მომენტებში უჭირდა, ახლა კი პრეზიდენტ ლაპორტას უფრო ძლიერი ბარსელონას ნახვა სურს. ფლიკის ინტენსიურ სტილში სათამაშოდ, ფეხბურთელებს იდეალურ ფორმაში ყოფნა მოუწევთ.

ჰანსის გუნდები ბურთს ფლობენ და სწრაფი შეტევებით არიან ცნობილნი. ეს სტილი მიუნხენის ბაიერნში ძალიან ეფექტიანი იყო - ფლიკის ხელმძღვანელობით "რეკორდმაისტერმა" ტრებლი მოიგო.

ბარსელონას გავისა და პედრისნაირი ენერგიული, ტექნიკური ფეხბურთელები ჰყავს, რომლებიც ფლიკის ფილოსოფიას ერგებიან, მაგრამ ტრავმის გამო სეზონის სტარტს ორივე მათგანი გამოტოვებს, ისევე, როგორც რონალდ არაუხო. 

ეჭვები არსებობს, ჟიულ კუნდე ფლიკის სისტემას რამდენად მოერგება, რადგან გერმანელს შემტევი ფლანგის მცველები მოსწონს.

თუ ჰანსის დანაკლისი არ ექნება, სავარაუდოდ, მისი ბარსელონა კარგ ფეხბურთს ითამაშებს, რადგან გერმანელის ფილოსოფია საგოლე მომენტების შექმნაში მდგომარეობს. ახალ სეზონში კაპიტან ტერ შტეგენს, დიდი ალბათობით, ბევრი საქმე ექნება.

ლამინ იამალი გერმანიაში ვარსკვლავი გახდა და 17 წლის ასაკში ევროპის ჩემპიონატზე ესპანეთის ჩემპიონობაში უმნიშვნელოვანესი წვლილი შეიტანა. ბარსელონაში უკვე იცოდნენ, რომ ლამინი უნიჭიერესი იყო და პირველ გუნდში დებიუტი 15 წლის ასაკში სწორედ ამიტომ ჰქონდა.

ევრო 2024-ზე გასაოცარმა პერფორმანსებმა იამალი კიდევ უფრო ცნობილი გახადა, განსაკუთრებით საფრანგეთის კარში გატანილი დიდებული გოლის შემდეგ, რის შემდეგაც მას პელეს ადარებდნენ.

ახლა იამალზე დიდი წნეხი იქნება, რადგან მისგან ყველა შესანიშნავი სეზონის ჩატარებას ელოდება. ბარსამ თავისი ტალანტი ფრთხილად უნდა გამოიყენოს, რათა წარსულში ბოიან კრკიჩთან და ანსუ ფატისთან მიმართებით დაშვებული შეცდომები არ გაიმეოროს.

სწორი მიდგომით, იამალი, შესაძლოა, ახალ სეზონში იმაზე შთამბეჭდავი იყოს, ვიდრე ევროპის ჩემპიონატზე იყო.

17 წლის მარკ ბერნალმა და 20 წლის მარკ კასადომ ამერიკულ ტურნეზე შესანიშნავად ითამაშეს და, შესაძლოა, ახალ სეზონში შანსები მიიღონ. კლუბში იმედოვნებენ, რომ ერთ-ერთი მათგანი მაინც სერხიო ბუსკეტსის გრძელვადიანი შემცვლელი იქნება. თუმცა, პრესეზონის მთავარი აღმოჩენა პაუ ვიქტორია.

ვიქტორი ბარსამ ჟირონას ახალგაზრდული გუნდიდან შეიძინა. პაუს 2023/24 წლებში ბარსა ატლეტიკში დიდებული სეზონი ჰქონდა, რის გამოც მას ფლიკმა შანსი პირველ გუნდშიც მისცა. უკვე ჩანს, რომ მის სანაცვლოდ €3 მილიონის გადახდა გამართლებული იყო. ვიქტორმა მანჩესტერ სიტისთან და რეალთან ჯამში 3 გოლი გაიტანა. პაუს უკვე ლევანდოვსკის კონკურენტად განიხილავენ.

იმაზე საუბარი, რომ ვიქტორი სასტარტო შემადგენლობის წევრი იქნება, ალბათ, ძალიან ადრეა, თანაც ის ჯერ არც დაურეგისტრირებიათ, მაგრამ 22 წლის ასაკში ესპანელი ლევანდოვსკის დუბლიორობისთვის შესანიშნავი კანდიდატია. ბარსელონას კარგი ფორვარდები ნამდვილად სჭირდება, რადგან ვიტორ როკემ მასში გადახდილი €30 მილიონი და გაცემული ავანსები აშკარად ვერ გაამართლა, რის გამოც, სავარაუდოდ, გაანათხოვრებენ.

კლუბის არასტაბილურობის ფონზე, ფლიკი, ალბათ, უბრალოდ სეზონის ჩამთავრებითაც კმაყოფილი იქნება. მისი წინამორბედი ჩავისგან განსხვავებით, რომელსაც ჩემპიონობის მიუხედავადაც აკრიტიკებდნენ, ჰანსის ასეთი ნდობა ჯერ არ აქვს. თუ სეზონი კარგად არ წავა, შესაძლოა, ის დიდი წნეხის ქვეშ მოექცეს.

ნაადრევად გაშვებისგან თავის ასარიდებლად, ფლიკს ტიტულებისთვის ბრძოლა მართებს და გუნდი მინიმუმ ჩემპიონთა ლიგის ჯგუფიდან უნდა გაიყვანოს - ეს კლუბის ფინანსური მდგომარეობის დასასტაბილურებლად აუცილებელია.

კოპა დელ რეის მოგება ბონუსი იქნება, მაგრამ ლაპორტასთვისა და კლუბის ფინანსური სიტუაციისთვის ყველაზე მნიშვნელოვანი - ფულის გამომუშავებაა. ახალ სეზონში გუნდმა თანხა ევროტურნირზე კარგი პერფორმანსით უნდა იშოვოს.

თამამი პროგნოზები

სეზონის მოთამაშე: ლამინ იამალი - პედრისა და გავის ფორმის გაურკვევლობის ფონზე, დიდი შანსია, ბარსელონას საუკეთესო ფეხბურთელი იამალი იყოს.

ყველაზე დიდი იმედგაცრუება: ჰანსი ფლიკი - გერმანელის არჩევის ერთ-ერთი მიზეზი ის იყო, რომ ის, გერმანიის ნაკრებიდან გაშვების შემდეგ, თავისუფალი აგენტი გახლდათ. თუ გუნდს ცუდი შედეგები ექნება, შესაძლოა, ფლიკი შობამდე გაათავისუფლონ.

საუკეთესო შენაძენი: პაუ ვიქტორი - ფასისა და პრესეზონზე ნაჩვენები თამაშის გათვალისწინებით, პაუს კარგი შანსი აქვს, რომ ეს სტატუსი გაამართლოს.

საუკეთესო ბომბარდირი: რობერტ ლევანდოვსკი - მიუხედავად იმისა, რომ პოლონელი ჩვეულ ფორმაში აღარ არის, მას მომენტების შექმნაში თანაგუნდელები დაეხმარებიან. რობერტო გუნდში ჯერ კიდევ საუკეთესო გამტანია.

მაქსიმუმი ჩემპიონთა ლიგაზე: მერვედფინალში გასვლა - ბარსელონა, სავარაუდოდ, 1/8-ფინალში ძლიერ გუნდთან წააგებს, როგორც გასულ სეზონში.

ადგილი ლა ლიგაში: 3 - ბარსა ჩემპიონ რეალთან საბრძოლველად საკმარისად ძლიერი არაა. ამასთან, ალბათ, კატალონიურ კლუბს ატლეტიკოც აჯობებს, რომელსაც ამბიციური პროექტი აქვს და შესანიშნავ ტრანსფერებს ახორციელებს.