ავტორიზაცია
ბარსელონაში ჰანსი ფლიკის პრეზენტაცია და პრესკონფერენცია გაიმართა
დღეს ბარსელონაში ჰანსი ფლიკის პრეზენტაცია შედგა - კლუბის პრეზიდენტი ჟოან ლაპორტა გერმანელთან ერთად მედიის წინაშე წარსდგა და პრესკონფერენცია გამართა.
ჟოან ლაპორტა: "ფლიკმა უკვე იცის, რომ ყველა ტიტულის მოსაგებად უნდა იბრძოლოს. დეკუ და ბოიანი ჰანსის შეხვდნენ, რის შემდეგაც მისი დანიშვნა გადავწყვიტეთ. ვნახეთ, რომ მას "ბლაუგრანას" გაწვრთნა შეეძლო. რამდენიმე კანდიდატი გვყავდა, მაგრამ გერმანელთან შეხვედრა გადამწყვეტი აღმოჩნდა. ჩვენი იდეები ერთმანეთს ემთხვევა. ფლიკს ამჟამინდელი შემადგენლობის სჯერა. ის ენთუზიაზმითაა განწყობილი.
ბარსა ყველაზე მაღლაა, შესაბამისად, ჩვენ კლუბის ინტერესები ყველაზე წინ უნდა დავაყენოთ. ჩავიმ ბარსელონაში ისტორია დაწერა, მაგრამ ცვლილებების დრო იყო. მინდა, მას მადლობა გადავუხადო. ერნანდესმა სადავეები ხელში ძალიან რთულ სიტუაციაში აიღო და ახალგაზრდებს ენდო. გასული სეზონი გეგმის მიხედვით არ წარიმართა და უნდა გვემოქმედა.
ჰანსი, შენს ხელში ვართ. ერთი მიზანი გვამოძრავებს. ბარსას ფანებს ენთუზიაზმი უნდა დავუბრუნოთ. შენი გვჯერა."
ჰანსი ფლიკი: "კონტრაქტის გაფორმებამდე პრეზიდენტთან ვისადილე. პირველივე წუთიდან ვიგრძენი, რომ ძალიან დიდ კლუბში მოვდიოდი. აქ ყველა გვეხმარება, რაც ქუჩებში ჩანს. რამდენჯერმე ვთქვი, რომ ლა მასიაში გაწეული მუშაობით ძალიან მადლიერი ვარ.
ახალგაზრდა ფეხბურთელები მზად არიან, ბარსასთვის ყველაფერი გაიღონ. ტექნიკური გუნდი სრულად ახალია და კლუბმა ამ ხალხის მოსაყვანად დიდი ძალისხმევა გაიღო. შესაბამისი ატმოსფერო უნდა შევქმნათ, რომ ბარსელონა უმაღლეს დონეზე დავაბრუნოთ. გვინდა, ლა მასიელები განვითარდნენ და მსურს, რომ მათთან ერთად ვიმუშაო.
კრუიფისდროინდელი ბარსას დონიდან შორს ვართ. ჩემი მიზანია, მოედანზე მყავდეს გუნდი, რომელიც აქტიურია და ბურთით თუ უბურთოდ აჩვენებს, რისთვის თამაშობს. ინიციატივა მნიშვნელოვანია. მნიშვნელობა არ აქვს, 4-2-3-1 სქემით ვითამაშებთ თუ 4-4-2-ით.
როცა ჰოფენჰაიმის მწვრთნელი ვიყავი, ვფიქრობდი, რომ ერთ დღესაც ბარსასთვის სათადარიგოთა სკამიდან გაძღოლა კარგი იქნებოდა. მათ მე ამირჩიეს და ჩემთვის ეს კლუბი ერთ-ერთი უდიდესია თუ ყველაზე დიდი არა. თუ ენთუზიაზმით ვიმუშავებთ, ყველაფრის მიღწევა შეგვიძლია."
