ბუდუ ზივზივაძე, შესაძლოა, კარლსრუედან წავიდეს - გერმანულმა კლუბმა სერიოზული შეთავაზება მიიღო

KA News-ის ინფორმაციით, მიმდინარე სატრანსფერო ფანჯარაზე, შესაძლოა, ბუდუ ზივზივაძე კარლსრუედან წავიდეს.

აღნიშნული წყაროს ცნობით, გერმანულმა კლუბმა ქართველი ფეხბურთელის თაობაზე საკმაოდ მიმზიდველი შეთავაზება მიიღო, რომელსაც, დიდი ალბათობით, დათანხმდება.

30 წლის ცენტრფორვარდის შესაძლო წასვლაზე საუბარი ადრეც იყო - მისი შეძენით სანქტ-პაული ინტერესდებოდა, მაგრამ ტრანსფერი არ შედგა. ამის შემდეგ თავად ბუდუმაც დაადასტურა, რომ კარლსრუეში დარჩებოდა.

ჯერჯერობით, უცნობია, ზივზივაძის ტრანსფერზე რომელი კლუბი მუშაობს, თუმცა, როგორც ჩანს, საქმე სერიოზულადაა. უახლოეს საათებში, სავარაუდოდ, მეტ ინფორმაციას შევიტყობთ.

აღსანიშნავია, რომ კარლსრუემ შტუტგარტიდან ლუკა პფაიფერი დაიმატა, რომელიც ფორვარდია და, შესაძლოა, სწორედ ბუდუს შემცვლელად განიხილებოდეს.