ბუნდესლიგა 2024/25: როგორ მოემზადნენ დაწინაურებული გუნდები ახალი სეზონისთვის?

წინა სეზონში გერმანიის ჩემპიონატიდან კიოლნი და დარმშტადტი გავარდნენ, ბოხუმმა კი, რომელიც დავქვეითების ზღვარზე იყო, ფლეიოფში დიუსელდორფი დრამატულ, ორმატჩიან ბრძოლაში დაამარცხა და ადგილი შეინარჩუნა.

შესაბამისად, 2024/25 წლების სეზონში ბუნდესლიგას მხოლოდ 2 ახალი კლუბი ეყოლება - ჰოლშტაინ კილი და სანქტ-პაული.

აღსანიშნავია, რომ კილი დებიუტანტია - ის ისტორიაში 58-ე გუნდი გახდება, რომელიც ბუნდესლიგის ითამაშებს და პირველი კლუბი, რომელიც შლეზვიგ-ჰოლშტაინის წარმომადგენელია. თუ ზოგადად გერმანიის ჩემპიონატს ავიღებთ, ისინი უმაღლეს ლიგაში 60-წლიანი პაუზის შემდეგ ბრუნდებიან. ამასთან, ჰოლშტაინი ჰანზა როსტოკს ბუნდესლიგის ისტორიაში ყველაზე ჩრდილოური კლუბის სტატუსს ჩამოართმევს.

ახალი სეზონის წინ კილმა არმინ გიგოვიჩი (€1.80 მლნ), მაგნუს კნუდსენი (€1.00), მაქს გეშვილი (€200 ათასი), ფილ ჰარესი (€200 ათასი), ანდუ კელატი (უფასოდ) და ტიმოთეუშ პუხაჩი (თანხა უცნობია) დაიმატა. ასევე, კლუბმა მეორე გუნდიდან ახალგაზრდა ტაილერ დოგანი დააწინაურა.

ჰოლშტაინმა პრესეზონზე 5 მატჩი ჩაატარა, საიდანაც მხოლოდ 1 მოიგო, 1 ფრედ დაასრულა და 3 წააგო. კილი ახალი სეზონის პირველ ოფიციალურ შეხვედრას 17 აგვისტოს, გერმანიის თასის 1/32-ფინალში, მესამელიგელი ალემანია ახენის წინააღმდეგ გამართავს, ბუნდესლიგის პირველ ტურში კი, 24 აგვისტოს, სტუმრად ჰოფენჰაიმს დაუპირისპირდება.

სანქტ-პაული ბუნდესლიგაში 13-წლიანი პაუზის შემდეგ ბრუნდება. ისტორიაში პირველად, ისინი უფრო მაღალ ლიგაში ითამაშებენ, ვიდრე მათი ადგილობრივი მეტოქე - ჰამბურგი. გარდა ამისა, გერმანიის ჩემპიონატს ქალაქ ჰამბურგის წარმომადგენელი 2017/18 წლების სეზონის შემდეგ პირველად ეყოლება.

გერმანულმა კლუბმა ახალი სეზონისთვის ფინ სტივენსი (€600 ათასი), მორგან გილავოგი (იჯარით), სკოტ ბენქსი (€400 ათასი), რობერტ ვაგნერი (იჯარით) და ბენ ფოლი (€100 ათასი) შეიძინა. ასევე, სანქტ-პაულმა სარეზერვო გუნდიდან პირველში მუჰამად დაჰაბა გადაიყვანა.

სანქტ-პაულმა პრესეზონზე 5 მატჩი ჩაატარა, საიდანაც მხოლოდ 1 ვერ მოიგო. აღსანიშნავია, რომ მათ ისეთი გუნდები დაამარცხეს, როგორებიც ლიონი (1-0), ნორვიჩი (3-1) და ატალანტა (3-0) არიან. გარდა ამისა, გერმანელებმა დაბალლიგელ ბრემერს 3-1 მოუგეს, და გროიტერ ფიურტთან 1-3 წააგეს.

სანქტ-პაული 2024/25 წლების სეზონის პირველ ოფიციალურ მატჩს 16 აგვისტოს, გერმანიის თასის 1/32-ფინალში, ჰალეშერის წინააღმდეგ ჩაატარებს, ბუნდესლიგის პირველ ტურში (25 აგვისტოს) კი საკუთარ მოედანზე ჰაიდენჰაიმს შეხვდება.