ჩავი სიმონსი პრემიერ ლიგაში? — ნიდერლანდელი ლაიფციგის დასატოვებლად ემზადება

მას შემდეგ, რაც ლაიფციგმა ევროტურნირებზე გასვლა ვერ მოახერხა, გუნდის ლიდერები რედ ბულ არენას დატოვებას აპირებენ. პოტენციურ წამსვლელთა სიაშია გუნდის ერთ-ერთი წამყვანი ფეხბურთელი, ჩავი სიმონსი, რომლის მიმართაც ინტერესს ტოპ კლუბები იჩენენ.

ბოლო საათებში გავრცელებული ინფორმაციის თანახმად, ჩელსიმ 22 წლის ნიდერლანდელის ტრანსფერზე მუშაობა ოფიციალურად დაიწყო. ლონდონურ კლუბში ახალგაზრდა ფეხბურთელი ძალიან მოსწონთ და ნონი მადუეკეს გაყიდვის შემდეგ, მის დამატებას აუცილებლად შეეცდებიან. ენცო მარესკას გუნდსა და ჩავი სიმონსის აგენტს შორის უკვე შედგა პირველი კონტაქტი, სადაც მხარეებმა პოტენციურ ტრანსფერზე ისაუბრეს. როგორც ირკვევა, ნიდერლანდელს ჩელსიში თამაშის დიდი სურვილი აქვს.

საქმეში სხვა ტოპ-კლუბებიც ერთვებიან — არსენალი, ბაიერნი და ბარსელონა ფეხბურთელის სიტუაციას ყურადღებით აკვირდებიან. მოსალოდნელია, რომ უახლოეს პერიოდში ისინი უფრო გააქტიურდებიან, თუმცა ამ ეტაპზე ფავორიტად ერთმნიშვნელოვნად ჩელსი სახელდება. ლაიფციგი 22 წლის ფეხბურთელს დაახლოებით 60-65 მილიონ ევროდ აფასებს.