ჩემპიონთა ლიგა: ბაიერნი-პსჟ და გურამ კაშია მილანის წინააღმდეგ

ეს, უდავოდ, დღის ცენტრალური მატჩია. მიუნხენში ერთმანეთს ორი ისეთი გუნდი ხვდება, რომლებსაც ქულები ძალიან სჭირდებათ - ბაიერნი სატურნირო ცხრილში მე-17 ადგილს იკავებს, პსჟ კი საერთოდ 25-ზეა და ფლეიოფის ზონის მიღმა იმყოფება.

ბაიერნმა ჩემპიონთა ლიგის პირველ ტურში დინამო ზაგრები 9-2 გაანადგურა, მე-2 ტურში მოულოდნელად ასტონ ვილასთან 0-1 დამარცხდა, მე-3 ტურში კი ბარსელონასთან 1-4 განადგურდა. მე-4 ტურში ვენსან კომპანის შეგირდები ბენფიკას შეხვდნენ და 1-0 მოუგეს. რაც შეეხება ბუნდესლიგას - "რეკორდმაისტერი" გერმანიის ჩემპიონატში დამაჯერებლად ლიდერობს. 

პარიზული კლუბი პირველ ტურში ჟირონას შეხვდა, სადაც პაულო გაცანიგას ავტოგოლის წყალობით იმარჯვა. მე-2 ტურში ლუის ენრიკეს გუნდი არსენალთან 0-2 დამარცხდა, შემდეგ პსვ-სთან 1-1 ითამაშა, მე-4 ტურში კი ატლეტიკოსთან ბოლო წამებზე წააგო. ლიგა 1-ში გუნდი, რა საკვირველია, პირველ ადგილზე არის.

გურამ კაშიას სლოვანი ხვალ "როსონერის" უმასპინძლებს.

ვლადიმირ ვაისის გუნდს 0 ქულა აქვს და ჩემპიონთა ლიგის სატურნირო ცხრილში ბოლო ადგილზე იმყოფება. სლოვაკები პირველ ტურში სელტიკთან 1-5 განადგურდნენ, მე-2 ტურში მანჩესტერ სიტისთან 0-4 წააგეს, შემდეგ ჟირონასთან 0-2 დამარცხდნენ, მე-4 ტურში კი დინამო ზაგრებთან მატჩი 1-4 დათმეს.

რაც შეეხება მილანს: პაულუ ფონსეკას შეგირდებს 6 ქულა აქვთ და მე-20 ადგილზე იმყოფებიან. პირველ ტურში იტალიელები ლივერპულს შეხვდნენ და მიუხედავად იმისა, რომ ანგარიში გახსნეს, საბოლოოდ 1-3 დამარცხდნენ. მე-2 ტურში მილანმა ლევერკუზენთან 0-1 წააგო, თუმცა მომდევნო ტურებში ხასიათი გამოიკეთა და ჯერ ბრიუგეს მოუგო 3-1, შემდეგ კი ამავე ანგარიშით რეალ მადრიდი დაამარცხა.

ხვალინდელი მატჩების განრიგი:

სლოვანი 🆚 მილანი | 21:45

სპარტა პრაღა 🆚 ატლეტიკო | 21:45

ბარსელონა 🆚 ბრესტი | 23:55

ლევერკუზენი 🆚 ზალცბურგი | 23:55

ბაიერნი 🆚 პსჟ | 23:55

ინტერი 🆚 ლაიფციგი | 23:55

მანჩესტერ სიტი 🆚 ფეინოორდი | 23:55

სპორტინგი 🆚 არსენალი | 23:55

იანგ ბოიზი 🆚 ატალანტა | 23:55