ჩემპიონთა ლიგა იწყება! - პირველი დღის ცენტრალურ მატჩს სან სირო უმასპინძლებს

6 მატჩიდან, ორი ადრეული იქნება - იუვენტუსი-ბენფიკა და იანგ ბოიზი-ასტონ ვილა 20:45 საათზე დაიწყება.

დღის ცენტრალური მატჩი 23:00 საათზე, სან სიროზე გაიმართება.

ლივერპულს პრემიერ ლიგაში კარგი სტარტი ჰქონდა, თუმცა მე-4 ტურში ნოტინგემ ფორესტთან წააგო. მერსისაიდელები აშკარა ფავორიტები იყვნენ, თუმცა მინიმალური სხვაობით დამარცხდნენ - ეს ნოტინგემისთვის ენფილდზე 1969 წლის შემდეგ პირველი მოგება იყო.

მეორე მხრივ, მილანმა ბოლო ტურში ვენეციას 4-0 მოუგო და ლივერპულთან მატჩს კარგ ხასიათზე ხვდება. ეს მოგება მნიშვნელოვანი იყო პაულუ ფონსეკასთვისაც, რომელსაც მძიმე სტარტი ჰქონდა.

ლივერპული გასულ სეზონში ევროპა ლიგაზე ასპარეზობდა, სადაც მეოთხედფინალში ატალანტასთან წააგო, ახლა კი გუნდი ჩემპიონთა ლიგაზე ბრუნდება. არნე სლოტი კი გასულ სეზონში ფეიენოორდთან ერთად ჩემპიონთა ლიგაზე იყო, მაგრამ მისმა გუნდმა ჯგუფში მე-3 ადგილი დაიკავა.

მერსისაიდულ გუნდს იტალიურ კლუბებთან ბოლო 5 გასვლითი მატჩი მოიგო. 2021/22 წლების სეზონში ლივერპულმა ჩემპიონთა ლიგის ჯგუფურ ეტაპზე მილანი ორივე მატჩში დაამარცხა.

ინგლისური გუნდების წინააღმდეგ მილანს ბოლო ორ სეზონში 2 მოგება და 2 ფრე აქვს. 

ხვალინდელ მატჩში "როსონერის" ისმაელ ბენასერი, ალესანდრო ფლორენცი, მარკო სპორტიელო და მალიკ ჩაუ არ ეყოლება, ლივერპულს კი მხოლოდ ჰარვი ელიოტი და ფედერიკო კიეზა აკლია.

მილანი და ლივერპული ევროპულ ტურნირებზე ერთმანეთს 4-ჯერ დაუპირისპირდნენ, მათ შორის, ორჯერ - ჩემპიონთა ლიგის ფინალში: 2005 წელს ლივერპულმა მოიგო, 2 წლის შემდეგ კი - მილანმა.

მოქმედი ჩემპიონი 23:00 საათზე, სანტიაგო ბერნაბეუზე გერმანულ კლუბს მიიღებს.

გასულ სეზონში მადრიდულ გრანდს გერმანული გუნდების წინააღმდეგ შესანიშნავი შედეგი ჰქონდა: კარლო ანჩელოტის შეგირდებმა მათ 5 მატჩი მოუგეს, 2 კი ფრედ დაასრულეს. რეალ მადრიდმა ფინალშიც გერმანული კლუბი (დორტმუნდი) დაამარცხა.

შტუტგარტი ჩემპიონთა ლიგაზე 2009/10 წლების სეზონის შემდეგ პირველადაა. გუნდი ბუნდესლიგაში კარგად გამოიყურება, მაგრამ ევროპაში გასვლით მატჩებში კარგი შედეგები არ აქვს: 6 წაგება, 3 ფრე და მხოლოდ 2 მოგება.

იუვენტუსი ჩემპიონთა ლიგაზე ბრუნდება და პირველ მატჩში პსვ-ს დაუპირისპირდება. იუვეს ნიდერლანდურ გუნდებთან კარგი სტატისტიკა აქვს: 9 მოგება, 7 ფრე და 6 წაგება.

ტურინელთა ახალი მთავარი მწვრთნელი, ტიაგო მოტა ევროასპარეზზე გუნდს პირველად გაიყვანს. მის ხელში "ბებერმა ქალბატონმა" პირველი 4 მატჩში არ წაუგია და გოლი არ გაუშვია, მაგრამ მათ მეტი გოლის გატანა მართებთ - იუვენტუსს ბოლო 3 შეხვედრაში არ გაუტანია.

პსვ შესანიშნავ ფორმაშია - გუნდმა ბოლო 5 მატჩი მოიგო, 20 გოლი გაიტანა და მხოლოდ 3 გაუშვა. თუმცა, იტალიაში თამაში მათთვის დიდი გამოწვევაა, რადგან ბოლო წლებში მათ ამ ქვეყანაში მხოლოდ 2-ჯერ მოიგეს (2 ფრე და 6 წაგება). მათი ბოლოს 2012 წელს, ნაპოლის წინააღმდეგ იმარჯვეს.

პსვ-ის მთავარმა მწვრთნელმა, პიტერ ბოშმა იუვენტუსთან წინა შეხვედრები წააგო და ზოგადად, გასვლით მატჩებში უჭირს - 2 მოგება, 2 ფრე და 6 წაგება. ნიდერლანდელებს ძლიერი სტარტი მართებთ, რადგან შემდეგ პარი სენ-ჟერმენსა და ლივერპულსაც უნდა დაუპირისპირდნენ.

ეს მატჩი სტარტს 20:45 საათზე აიღებს.

"რეკორდმაისტერი" ჩემპიონთა ლიგაზე ზედიზედ მე-17 სეზონს ჩაატარებს. ბუნდესლიგაში გუნდს ბრწყინვალე სტარტი აქვს - გუნდმა პირველ 3 მატჩში 11 გოლი გაიტანა. ბაიერნი ზაგრების წინააღმდეგ საკმაოდ ოპტიმისტური განწყობით იქნება, რადგან ჩემპიონთა ლიგის საშინაო შეხვედრებში არ უჭირს.

დინამო ზაგრები ჩემპიონთა ლიგაზე ბოლოს 2022/23 წლების სეზონში იყო. გუნდს აღნიშნულ ტურნირზე მოგების ძალიან დაბალი მაჩვენებელი აქვს. ხორვატულ გუნდს ევროასპარეზზე გერმანული კლუბი არასდროს დაუმარცხებია. მათ გერმანელებთან ბოლო 6 მატჩი წააგეს და გოლიც არ გაუტანიათ. თუმცა, დინამომ ბოლო პერიოდში გასვლით შეხვედრებში შედეგები გააუმჯობესა და ბოლო 3 მატჩიდან 2 მოიგო. გუნდს ბაიერნის წინააღმდეგ სოლიდური დაცვითი თამაში მართებს.

იანგ ბოიზი 🆚 ასტონ ვილა

ეს გუნდები ერთმანეთს 20:45 საათზე შეხვდებიან.

იან ბოიზი ფლეიოფში პირველად გასვლას იმედოვნებს. შვეიცარიულ კლუბს საშინაო მატჩებში საკმაოდ უჭირს - მათ ბოლო 7 შეხვედრიდან 4 წააგეს. შვეიცარიის ჩემპიონატში გუნდი ბოლო ადგილზეა და მოგება არ აქვს, თუმცა ისინი ყველა ტურნირი ეგიდით გამართულ ბოლო 7 მატჩში დაუმარცხებკები არიან.

ასტონ ვილა პრემიერ ლიგაში შესანიშნავად გამოიყურება: პირველ 4 ტურში გუნდმა 9 ქულა მოიპოვა. მე-4 ტურში უნაი ემერის შეგირდებმა ევერტონს მატჩი 0-2-დან დაუტრიალეს და 3-2 მოიგეს. ასტონ ვილა შვეიცარიაში ფავორიტის სტატუსით ჩადის, მაგრამ ევროასპარეზზე გასვლით მატჩებში არცისე კარგი შედეგები აქვს: 11 მატჩიდან მხოლოდ 2 მოგება.

ლისაბონელები საშინაო ჩემპიონატში დიდებულად ასპარეზობენ: პირველ 5 ტურში მოიგეს, 19 გოლი გაიტანეს და მხოლოდ 2 გაუშვეს. გუნდი პორტუგალიის უმაღლეს ლიგაში პირველ ადგილზეა და სურს, ეს სტარტი ჩემპიონთა ლიგაზეც გადაიტანოს. პირველ მატჩში სპორტინგი ლილს დაუპირისპირდება, რომელიც ბოლო წინა ორ შეხვედრაში დაამარცხა.

აღსანიშნავია, რომ ლისაბონურ კლუბს ჩემპიონთა ლიგის გახსნით მატჩებში გასულ ორ სეზონში 2 მოგება აქვს. ამ ტურნირზე ბოლო 8 საშინაო მატჩში პორტუგალიელთა აქტივში 4 მოგება და 4 წაგებაა.

ლილმა ლიგა 1 არასტაბილურად დაიწყო (2 მოგება, 2 წაგება). ფრანგულმა კლუბმა ჩემპიონთა ლიგაზე ბოლო 15 გასვლითი მატჩიდან 10 შეხვედრა წააგო. ამასთან, ისინი პორტუგალიურ გუნდებთან ბოლო 6 მატჩში დამარცხდნენ.

მიუხედავად ამისა, ლილმა აჩვენა, რომ ჩემპიონთა ლიგაზე კარგი შედეგების დაფიქსირება შეუძლიათ: 2021/22 წლების სეზონში მათ შესანიშნავად იასპარეზეს და ჯგუფიდანაც გავიდნენ.