ჩემპიონთა ლიგა | მე-3 ტურის მეორე სათამაშო დღე კატალონიურ-გერმანული დაპირისპირებით

ტურის ცენტრალური მატჩი, უპირობოდ, ეს დაპირისპირებაა.

კატალონიური კლუბი ბრწყინვალე ფორმაშია და ლა ლიგას ერთპიროვნულად ლიდერობს. ჰანსი ფლიკის გუნდი ძალიან ბევრ გოლს იტანს და ცოტას უშვებს. ჩემპიონთა ლიგის პირველ ტურში ბარსამ მონაკოსთან წააგო (1-2), თუმცა შემდეგ იანგ ბოიზი 5-0 გაანადგურა.

აღსანიშნავია, რომ ბოლო წლებში ბარსელონას ბაიერნთან საკმაოდ უჭირს. "ლურჯ-ბროწეულისფერებმა" "რეკორდმაისტერი", ჯერჯერობით უკანასკნელად, 2015 წელს, ჩემპიონთა ლიგის ნახევარფინალში დაამარცხეს და საბოლოოდ, ჩემპიონებიც გახდნენ. ამასთან, ბაიერნი ბარსასგან გოლსაც არ უშვებს: გერმანულმა კლუბმა ბოლო გოლი 2020 წელს, ლუის სუარესისგან გაუშვა: ურუგვაელი თავდამსხმელი დღემდე ბოლო ბარსელონელია, ვინც ბაიერნს გაუტანა.

ბაიერნს მიმდინარე სეზონში ახალი მწვრთნელი ჰყავს, რომლის ხელშიც ცუდად ნამდვილად არ გამოიყურება და ბუნდესლიგაში პირველ ადგილზეა. ჩემპიონთა ლიგის პირველ ტურში გერმანელებმა დინამო ზაგრები არ დაინდეს და 9-2 მოუგეს, მაგრამ მომდევნო ტურში, ბირმინგემში, ასტონ ვილასთან წააგეს.

შეიძლება ითქვას, ეს მატჩი 2024/25 წლების სეზონში ორივე გუნდისთვის პირველი სერიოზული გამოცდაა.

ბარსელონას სავარაუდო XI: ინიაკი პენია; კუნდე, კუბარსი, ინიგო მარტინესი, ბალდე; კასადო, პედრი; იამალი, ოლმო, რაფინია; ლევანდოვსკი

ბაიერნის სავარაუდო XI: ნოიერი; გერეირუ, უმაპეკანო, კიმ მინ-ჯე, დევისი; კიმიხი, პალინია; ოლისე, მიულერი, გნაბრი; კეინი

ძალიან საინტერესო შეხვედრა გაიმართება გერმანიაშიც.

ლაიფციგს მიმდინარე სეზონში ბუნდესლიგაში კარგი შედეგები აქვს და ბაიერნს მხოლოდ ბურთების შეფარდებით ჩამორჩება, მაგრამ ამას ჩემპიონთა ლიგაზე ვერ ვიტყვით: მარკო როზეს შეგირდებმა პირველ ტურში ატლეტიკოსთან წააგეს (1-2), მე-2 ტურში კი საკუთარ მოედანზე იუვენტუსთან დამარცხდნენ (2-3).

რაც შეეხება ლივერპულს: მერსისაიდელები არნე სლოტის ხელმძღვანელობით სოლიდურად ასპარეზობენ და პრემიერ ლიგასაც ლიდერობენ: ენფილდის ბინადრები მთავარ კონკურენტ მანჩესტერ სიტის 1 ქულით უსწრებენ. "წითლებმა" ჩემპიონთა ლიგაც კარგად დაიწყეს და პირველ ტურში, სან სიროზე, მილანი 3-1 დაამარცხეს, მიუხედავად იმისა, რომ მატჩის სტარტიდანვე აგებდნენ. მეორე ტურში ლივერპული ბოლონიას დაუპირისპირდა და 2-0 მოუგო.

ლაიფციგის სავარაუდო XI: გულაჩი; კლოსტერმანი, ორბანი, ლუკება, გერტრუიდა; ჰაიდარა, ვერმეერენი; ნუსა, სიმონსი; ოპენდა, შეშკო

ლივერპულის სავარაუდო XI: კელეჰერი; ალექსანდრ-არნოლდი, კონატე, ვან დაიკი, რობერტსონი; გრავენბერხი, სობოსლაი; სალაჰი, კერტის ჯონსი, ლუის დიასი; ნუნიესი

საინტერესო უნდა გამოდგეს ეს დაპირისპირებაც.

"როხიბლანკო" შიდა ჩემპიონატში ნორმალურად გამოიყურება - დიეგო სიმეონეს ბიჭები პრიმერა დივიზიონში 20 ქულით მე-3 პოზიციას იკავებენ და მხოლოდ ბარსელონასა და რეალ მადრიდს ჩამორჩებიან. ატლეტიკომ ჩემპიონთა ლიგაზე გამოსვლა ლაიფციგთან მოგებით (2-1) დაიწყო, მაგრამ მე-2 ტურში, საკმაოდ სენსაციურად, ბენფიკასთან 0-4 განადგურდა.

ლილი ლიგა 1-ში მე-4 ადგილზე იმყოფება, მასზე წინ კი მარსელი, მონაკო და პარი სენ-ჟერმენი არიან. ბრუნო ჟენეზიოს შეგირდები საფრანგეთის ჩემპიონატის ლიდერ პსჟ-ს 6 ქულით ჩამორჩებიან. ჩემპიონთა ლიგის პირველ ტურში ფრანგულმა გუნდმა სტუმრად, პორტუგალიაში, ლისაბონის სპორტინგთან 0-2 წააგო, მაგრამ შემდეგ რეალ მადრიდი დაამარცხა და მადრიდელთა 36-მატჩიანი წაუგებელი სერია შეწყვიტა.

ატლეტიკოს სავარაუდო XI: ობლაკი; მოლინა, ვიტსელი, ხიმენესი, რეინილდო, ლინო; დე პოლი, კოკე, გალაგერი; გრიზმანი, ალვარესი

ლილის სავარაუდო XI: შევალიე; მუნიე, დიაკიტე, ალექსანდრო, გუდმუნდსონი; ბუადი, ანდრე; ჟერგოვა, გომესი, საჰრაუი; დევიდი

20:45 | ატალანტა 🆚 სელტიკი

20:45 | ბრესტი 🆚 ლევერკუზენი

23:00 | ატლეტიკო 🆚 ლილი

23:00 | ბარსელონა 🆚 ბაიერნი

23:00 | ბენფიკა 🆚 ფეინოორდი

23:00 | მანჩესტერ სიტი 🆚 სპარტა პრაღა

23:00 | ლაიფციგი 🆚 ლივერპული

23:00 | ზალცბურგი 🆚 დინამო ზაგრები

23:00 | იანგ ბოიზი 🆚 ინტერი