ჩემპიონთა ლიგის ბოლო ტურის პირველი დღე: სიკვდილის ჯგუფი, ბერნაბეუზე მოსაგებად ჩასული ინტერი და სხვა

დღეს 7 დეკემბერი და სამშაბათია, რაც იმას ნიშნავს, რომ ჩემპიონთა ლიგის ჯგუფური ეტაპის მე-6 ტური იწყება და პლეი-ოფში უკვე გასული 11 მონაწილეს დღეს კიდევ რამდენიმე გუნდი შეუერთდება.

ტრადიციულად, ორი მატჩი ნაადრევად არის გამოტანილი და დღეს 21:45 საათზე A ჯგუფის ორი თამაში გაიმართება.

„ლაიპციგი“ – „მანჩესტერ სიტი“
„პსჟ“ – „ბრიუგე“

ამ ჯგუფის ორ გრანდს ყველაფერი გადაწყვეტილი აქვს - „სიტი“ პირველი ადგილით გადის პლეი-ოფში, „პსჟ“ კი მეორეთი. ერთადერთი, რისი გარკვევაც დარჩა - მესამეადგილოსანია. ამ ეტაპზე „ლაიპციგს“ და „ბრიუგეს“ 4-4 ქულა აქვთ და სწორედ მათ შორის უნდა გაირკვეს, თუ ვინ გადავა ევროპა ლიგაზე.

ამაში ფავორიტი გერმანული გუნდია - თუ „ბრიუგე“ პარიზში რაიმე ქულებს არ გამოკრავს ხელს და სიტყვაზე ორივე წააგებს, ევროპა ლიგაზე „ლაიპციგი“ გადავა. 

ახლა კი, გადავიდეთ 23:55 საათის მატჩებზე, სადაც ბევრად მეტი და ბევრად საინტერესო სანახაობები გველის.

ჯგუფი B: 

„მილანი“ – „ლივერპული“
„პორტუ“ – „ატლეტიკო მადრიდი“

ჩემპიონთა ლიგის ერთ-ერთი ყველაზე დაძაბული და ჩახლართული ჯგუფი, რომელსაც თავიდანვე „სიკვდილის“ სახელწოდება მიენიჭა. „ლივერპულმა“ ამ პერიპეტიებს თავი მარტივად დააწია და 15 ქულით პირველი ადგილი დიდი ხანია განაღდებული აქვს.

შემდეგ კი მოდის ის, რასაც ბევრი ამ ჯგუფისგან ელოდა - შემდეგ ეტაპზე გასვლის შანსი სამივე გუნდს აქვს, თუმცა ყველაზე კარგ მდგომარეობაში „პორტუა“, რომელსაც თავისი ბედი საკუთარ ხელში აქვს და თუ დღეს „ატლეტიკოს“ შინ მოუგებს, შემდეგ ეტაპზეც უმტკივნეულოდ გავა.

„მილანი“ და „ატლეტიკო“ კი ბურთების სხვაობაზე არიან დამოკიდებულები - ურთიერთშეხვედრებში გუნდებს შორის თანაფარდობაა და ამიტომ, თუ „ატლეტიკომ“ სტუმრად „პორტუს“ მოუგო, ხოლო „მილანმა“ შინ „ლივერპული“ დაამარცხა - ყველაფერი ბურთების სხვაობით გადაწყდება.

ამ ეტაპზე, მესამე ადგილზე „მილანია“, რომელსაც ბურთის სხვაობა -2 აქვს „ატლეტიკოს“ -3-თან შედარებით.

ჯგუფი C:

„აიაქსი“ – „სპორტინგი“
„დორტმუნდი“ – „ბეშიქთაში“

მიუხედავად იმისა, რომ თითქოს, შედარებით თანაბარი და ბრძოლისუნარიანი ჯგუფი უნდა ყოფილიყო (ყოველ შემთხვევაში 3 მონაწილეს შორის), ყველაფერი ჯერ კიდევ ბოლო ტურამდე გადაწყდა.

შემდეგ ეტაპზე გასვლა „აიაქსს“ და „სპორტინგს“ აქვთ განაღდებული, ევროპა ლიგაზე ასპარეზობას კი „დორტმუნდი“ გააგრძელებს. გერმანულმა გუნდმა ჯგუფში ჩარჩენა იმისდა მიუხედავად მოახერხა, რომ პირველ ორ ტურში გამარჯვება იზეიმა, „სპორტინგი“ კი - პირიქით, საწყის ორ რაუნდში მარცხის მიუხედავად, მეხუთე ტურის შედეგად გავიდა პკეი-ოფში, თანაც თავის ისტორიაში მხოლოდ მეორედ.

ჯგუფი D:

„რეალი“ – „ინტერი“
„შახტარი“ – „შერიფი“

ამ ჯგუფშიც გასარკვევი ბევრი არაფერია - მიუხედავად „შერიფის“ დიდი სენსაციებისა, როგორიცაა მაგალითად „სანტიაგო ბერნაბეუზე“ მოგება, მოლდოვური გუნდი ასპარეზობას ევროპა ლიგაზე აგრძელებს, „შახტარისთვის“ კი ევროტურნირები ამ სეზონში დღეს სრულდება.

ერთადერთი, რაც გასარკვევი დარჩა ამ კვარტეტში - ჯგუფის პირველადგილოსანია. „რეალს“ „სანტიაგო ბერნაბეუზე“ დღეს ფრეც ეყოფა იმისთვის, რომ ჯგუფში პირველი ადგილი გაინაღდოს, „ინტერს“ კი მოსაგები აქვს.